Türkmen talyby "Instagramyň" kemçiligini ýüze çykardy

Türkiýäniň Kastamonu uniwersitetiniň matematika fakultetiniň türkmenistanly talyby Almaz Seýidow meşhur "Instagram" sosial ulgamynda kemçilik ýüze çykardy. Bu barada türk metbugatyna salgylanyp, ORIENT habar berýär.
22 ýaşly Almaz Seýidow “Haberlisin.com”-yň onlaýn neşirine "Instagram" programmasynda nähili ýalňyşlyklary tapandygyny, olaryň haýal etmän düzedilmelidigini aýtdy.
Almaz öz ýüze çykaran kemçiligi barada düşündirip: “Sosial ulgamlaryň hasaplarynda howpsuzlyk bilen bagly ýalňyşlygyň ýüze çykandygyny gördüm we gözleg işlerine başladym. Gözleglerimiň netijesinde "üstüni açan" kemçiligimi subut etmek üçin meşhur futbolçy Miralem Pýaniçiň "Instagram" hasabyna girdim we şol ýerde halaýan birnäçe suratymy belledim. Şonuň üçin ýüze çykarylan howpsuzlyk ýalňyşlygyny subut edip bilerin öýdüpdim".
Almaz degişmek üçin käwagt "Instagramda" türk şou-biznesiniň we dünýä futbol ýyldyzlarynyň meşhur şahsyýetleriniň hasaplaryndan göni ýaýlyma çykýandygyny, ýöne diňe güýmenmek we "Instagramyň" gowşak goragyny görkezmek üçin şeýdýändigini aýtdy. Ol beýle hereketlerinde meşhur internet programmalary ulgamynda howpsuzlyk meselesiniň bardygyny görkezmekden başga hiç hili niýetleriniň bolmandygyny düşündirýär.
“Bu howpsuzlyk näsazlygy we gowşak goraglylyk, mümkin boldugyça, gysga wagtda düzedilmelidir. Erbet adamlaryň eline düşse, olary dürli maksat bilen ulanyp bilerler. Mundan bir aý öň “Apple” ulgamynda ýalňyşlyk tapypdym. Bu barada derrew Apple bilen habarlaşdym we olar näsazlygy düzetdiler. Indi, meniň pikirimçe, Instagram hem bu kemçiligi aradan aýyrmaly we degişli çäreleri görmeli" diýip, Almaz belleýär.