ABŞ-da koronawirus alamatlarynyň sanawynyň üstüni ýetirdiler

Koronawirus alamatlarynyň sanawynyň üsti ýetirildi. Bu barada kesellere gözegçilik we öňüni alyş boýunça federal merkezde habar berdiler, muny pravda.ru ýetirýär. Ýagny, amerikan hünärmenleri COVID-19-yň ýüze çykyş sanawyna diareýany, ýürek bulanmany, dümewi we burun dykylmasyny girizdiler. Öň koronawirusyň alamatlary diýlip, ýokary temperatura, dem almanyň kynlaşmasy, kellagyry, ys alyş we tagam biliş duýgusynyň ýitmegi, bokurdagyň gijelemesi, çalt ýadamaklyk we myşsalaryň agyrmagy hasaba alynýardy. 
“Bu sanaw hem ähli mümkin bolan alamatlary öz içine almaýar. Keseliň alamatlary kesel degenden soň ilkinji iki hepdede ýüze çykýar” – diýip, TASS hünärmenleriň sözlerini getirýär. Bu maglumatlar koronawirus barada täze maglumatlaryň ýüze çykmagy bilen täzelenip durlar.
Öň, “Plos one” lukmançylyk žurnalynda neşir edilen, Beýik Britaniýada Lids uniwersiteti tarapyndan taýýarlanylan barlag işine laýyklykda, keseliň giňden ýaýran alamatlaryna şular degişli – temperatura, üsgülewük, ýokary ýadawlyk, ysyň ýitmegi we dem almanyň kynlaşmasy.
Alymlar keseliň alamatlarynyň ýüze çykýan ýerine baglylykda tapawutlanyp bilýändigini belleýärler. Meselem, ýokary temperatura Singapurda kesellänleriň 72%-inde, Günorta Koreýada bolsa 32%-inde bellige alyndy. Üsgülewük Niderlandiýada syrkawlaryň 72%-inde, Günorta Koreýada 18%-inde ýüze çykaryldy. Hünärmenler täze wirusyň aýratynlygyny we onuň adam organizmine täsirini öwrenmegi dowam etdirýärler.