Britan alymlary yssy we sowuk howa üçin uýgunlaşýan eşigi döretdiler

Mançester uniwersitetiniň alymlary aýazly howada gyzdyryp, yssy howada sowadyp biljek “akylly” matany döretdiler. Materialyň esasyna grafen girdi diýlip, University of Manchester saýtynda habar berilýär, muny mir24.tv ýetirýär.
Hünärmenler düzümine grafen girýän ýörite matany döretdiler. Onuň gowşak elektrik togy berlende infragyzyl şöhlesiniň geçirijiliginiň görkezijisini üýtgetme häsiýeti bar. Bu ukyby alymlar tejribe maksatlary üçin ulanmak kararyna geldiler. “Akylly” mata infragyzyl şöhlesini bloklap ýa-da ony arkaýyn goýberip bilýär. Şeýlelik bilen, eşigiň temperatura görkezijisini sazlamak bolýar.
Ilkibaşda bu pikir harby maksatlar üçin döredilipdi. Hünärmenler esgerleri teplowizorlardan gizläp biljek eşigi döretmegi meýilleşdirdiler. Ýöne şeýle usul bilen material diňe ýylylygy ýygnaýardy, ony bolsa çykarmak gerek. Netijede, alymlar özüni gapma-garşy temperaturalarda birmeňzeş gowy görkezip biljek eşigi döretmek kararyna geldiler.
Britaniýalylar eýýäm matanyň bedeni gyzdyryp we sowadyp bilijilik ukybyny görkezýän futbolkanyň prototipini döretdiler. Ýöne alymlar munuň bilen çäklenmek islemeýärler. Geljekde olar bu tehnologiýanyň esasynda kosmiki hemralar üçin örtük döretmegi meýilleşdirýärler.
Ýatlap geçsek, aprelde hytaý alymlary yssyda we sowukda adamyň bedeniniň oňaýly temperaturasyny saklamaga ukyply bolan matany hödürlediler. Onuň adaptiw materialynyň düzümine ýüpekden ýüplük we hitozan girýär.