Ýewropada täze awtomobilleriň satuwy pese gaçdy

Ýewropa awtosenagatyna dikelmek üçin heniz köp wagt gerek. Maý aýynda ýeňil awtomobilleriň satuwy Ýewropada ýene bir pese gaçyşy başdan geçirdi. Köp ýurtlarda koronawirus sebäpli girizilen çäklendiriji çäreleriň gowşadylandygyna garamazdan, Ýewropa Bileleşiginde satylan täze ulaglaryň sany geçen ýylyň degişli döwri bilen deňeşdirilende 52 göterimden gowrak kemeldi. Bu barada Euronews habar berýär. Maý görkezijileriniň aprel aýyndakylardan gowudygyna garamazdan, ýagdaýyň doly derejede düzelmegi heniz uzakda. Konweýerden çykan awtomobilleriň satuwynyň ýokary pese gaçyşy Ispaniýada bellige alyndy, ýagny minus 72%. Fransiýada görkeziji 50% peseldi. Italiýada we Germaniýada 49%.
Öndürijiler barada aýdylanda, BMW Group awtoöndürijisiniň maý aýy boýunça satuwy 50% kemeldi. PSA Group awtomobil gurluşyk kompaniýasynda hem uly otrisatel ösüş bellige alyndy (-56,4%). Renault fransuz awtoöndürijisi satuwyň 52,5% pese düşmegini bellige aldy. Şeýle görkezijiler Volkswagen kompaniýasyna hem degişli.
Koronawirus pandemiýasy başlanyndan bäri Ýewropa awtosenagatynyň wekilleri onlarça müň işgärleriň işden çykarylýandygy barada mälim etdiler. Maýyň ahyrynda Renault kompaniýasynyň ýolbaşçylygy tutuş dünýä boýunça 15 müň iş ornuny kemeltmek bilen bagly meýilnamasy barada habar berdi. Çözgüt iki milliard ýewrony tygşytlamak boýunça meýilnamanyň çäklerinde kabul edildi. Kompaniýada düzüm üýtgeşmeleriniň ýuwaş-ýuwaşdan meýletin işden çykma arkaly, täze hünär öwretme ýoly ýa-da adamlary başga wezipelere geçirmek ýoly bilen amala aşyryljakdygy bellenildi. Iýunyň başynda Renault 5 milliard möçberde karz almak maksady bilen döwlet bilen şertnama baglanyşdy.