BMW kompaniýasy özüniň Mýunhendäki 104 ýyllyk taryhy bolan iň köne zawodyny düýpli üýtgedip gurmaga başlady. 2027-nji ýyla çenli bu kärhana diňe elektromobilleri öndürip başlar.
650 million ýewro möçberindäki döwrebaplaşdyrma işleri taryhy meýdançany «Neue Klasse» tapgyrynyň döwrebap önümçilik merkezine öwrer. Bu ugurdaky ilkinji uly ädim 2026-njy ýylyň awgustynda täze BMW i3 modeliniň — doly elektrikli sedanyň önümçiliginiň ýola goýulmagy bolar (bu model «iX3» elektrik krossowerinden soňra «Neue Klasse» tapgyrynyň ikinji modeli bolar).
Taslama netijelilik, durnuklylyk we sanlylaşdyrma ýörelgelerine esaslanýan «iFACTORY» strategiýasynyň çäginde amala aşyrylýar. Täzelenen önümçilikde, 800 sany senagat robotynyň kömegi bilen kuzow bölümindäki awtomatlaşdyrma derejesi 98%-e ýeter.
Hil gözegçiligi üçin emeli aň ulgamlary we kameralar ulanylar, logistika amallarynyň 60%-ini bolsa sürüjisiz ulag ulgamlaryna tabşyrmak meýilleşdirilýär.
Bellemeli zat, zawodyň gaýtadan gurluşygy häzirki önümçiligi duruzmazdan alnyp barylýar we günde 1000-e çenli awtoulag öndürmek ukybyny saklap galýar. Täze modeller üçin elektrikli hereketlendirijiler Awstriýadan, ýokary woltly batareýalar bolsa Bawariýanyň başga bir kärhanasyndan getiriler, bu bolsa täze önümçilik zynjyryna doly goşulyşmagy üpjün eder.
