«South China Morning Post» neşiri Henan sebitiniň 90 ýaşly ýaşaýjysy Çžan Çžunýi baradaky gynançly wakany gürrüň berdi. Bu adam maşgala agzalarynyň ählisini ýitirenden soň, hasrata döz gelmek üçin 30 ýyldyr welosipedli Hytaýa syýahat edýär.
1990-njy ýyllarda dogduk mekanyny terk eden goja müňlerçe kilometr ýol geçdi we wagtyň geçmegi bilen adaty welosipedini üç tekerli welosipede çalyşdy.
Çžan uzak ýyllaryň dowamynda agyr ýatlamalar sebäpli öýüne dolanmakdan gaçandygyny, ýöne indi kalbynda rahatlyk tapandygyny aýdýar.
«Men geçmişi goýberdim. Indi ömrümiň galan bölegini syýahatda geçirmek we tebigatyň gözelliginden lezzet almak isleýärin» – diýip, ol belleýär.
Ýatkeşliginiň gitdigiçe peselýändigine garamazdan, ol nahar we eşik bilen kömek edýän adamlara bil baglap, ýoluny dowam etdirýär. Öz gezeginde, syýahatçy hem adamlar üçin nähilidir bir peýda getirmek isläp, munuň üçin gowy usul tapdy: onuň köne welosipediniň ýüzüne dereksiz ýiten adamlar baradaky bildirişler ýelmenen.
