Aziýanyň Ösüş banky COVID-19-a dessin taýýarlyk görmek boýunça çäreleri bilen tanyşdyrdy

Aziýanyň Ösüş bankynyň Merkezi Aziýa sebit ykdysady hyzmatdaşlyk Maksatnamasynyň çäklerinde bu Maksatnamanyň Milli utgaşdyryjylarynyň onlaýn-görnüşinde geçirilen geňeş maslahatynyň barşynda hyzmatdaşlygyň ileri tutulýan ugurlary ara alnyp maslahatlaşyldy. Onuň işine türkmen tarapyndan Maliýe we ykdysadyýet ministrliginiň ýolbaşçylary gatnaşdylar.
Duşuşyga gatnaşyjylar Maksatnamanyň ykdysady, söwda, energetika, syýahatçylyk ulgamlarynda, ykdysady geçelgeleri döretmek boýunça amala aşyrylan taslamalar, şeýle hem Aziýanyň Ösüş banky tarapyndan saglygy saklaýyş ulgamynda COVID-19 pandemiýasyna dessin taýýarlyk görmek boýunça geçirilýän çäreler bilen tanyşdyryldy.
Häzirki ýagdaýyň jemlerini jemlemek hem-de pandemiýanyň bu Maksatnama gatnaşyjy ýurtlaryň ykdysadyýetine ýetirýän täsirini ara alyp maslahatlaşmak, maksatnamanyň işiniň netijelerine baha bermek, şeýle hem zerur bolan üýtgetmeleri ylalaşmak maslahatyň esasy maksatlary hökmünde kesgitlenildi.