Alymlar antibedenjikleriň koronawirusa durnuklylygyny bahalandyrdylar

Alymlar koronawirusa garşy immunitetiň ýüze çykyp bilmek mümkinçiligini şübhe astyna aldylar, sebäbi antibedenjikler oňa garşy durnuksyz bolýarlar. Degişli barlag medRxiv.org portalynda neşir edildi. Bu barada ria.ru habar berýär. Hünärmenleriň pikiriçe, COVID-19-dan gutulanlarda wirusdan uzak wagtlaýyn goragy kepillendirýän antibedenjikler ösüp bilmez. Şonuň üçin gaýtadan keselläp bilmek howpy bar.
Hytaý we amerikan hünärmenleri Uhan şäherinde infeksiýanyň ýüze çykmagynyň irki tapgyrynda bolan adamlar bilen gönüden-göni gatnaşyk eden lukmanlarda immunitetiň ýüze çykmagy boýunça maglumatlary öwrendiler. Netijede kesellänleriň paýynyň, takmynan, 25 göterime barabardygyna garamazdan, antibedenjiklere 23 müň adamdan diňe dört göteriminiň eýedigi anyklanyldy.
“Adamlarda bu wirusa garşy uzak wagtlaýyn antibedenjikleriň dörejekdigi gümana” – diýlip, makalada bellenilýär.
Antibedenjikler – bu wirusy we adamyň organizmine daşyndan düşýän beýleki patogenleri bitaraplaşdyrýan ganyň belogy. Her bir patogen üçin organizm gutulansoň birnäçe wagtlap ganyň düzüminde galýan ýörite antibedenjikleri döredýär. Olaryň käbirleri, esasanam, G immunoglobulinleri 12 ýyla çenli ýaşap bilýär.
Hünärmenler syrkawlaryň on göteriminden gowragynda antibedenjikler organizmden olar gutulandan soň bir aýyň içinde ýitendir diýen netijä geldiler. Şeýle-de, lukmanlar koronawirusa garşy immunitet keseli ýeňil ýa-da agyr formada geçiren adamlarda döräp bilmez diýip hasaplaýarlar.