Geçen hepde boýunça Türkmenistanyň birža täzelikleri

Geçen hepdede Türkmenistanyň Döwlet haryt-çig mal biržasynyň söwdalarynda geleşikleriň 37-si hasaba alyndy.
Daşary ýurt walýutasyna Birleşen Arap Emirlikleriniň we Owganystanyň işewür toparlarynyň wekilleri Türkmenbaşydaky nebiti gaýtadan işleýän zawodlar toplumynda öndürilen awiasion kerosini, gönüleýin benzin, awtobenzin, suwuklandyrylan gaz satyn aldylar.
«Türkmengaz» döwlet konserninde öndürilen dürli kysymdaky polietilen Russiýa Federasiýasynyň, Birleşen Arap Emirlikleriniň, Owganystanyň telekeçileriniň geleşikleriniň esasyny düzdi.
Mundan başga-da, daşary ýurt puluna tekiz reňklenen we žakkard tüýjümek önümler, nah ýüplügi satyn alyndy. Satyn alan ýurtlar: Russiýa, Beýik Britaniýa, Türkiýe, Azerbaýjan, Gyrgyzystan. Geleşikleriň jemi bahasy ABŞ-nyň 10 million 381 müň dollaryndan gowrak boldy.
Manat serişdelerine BAE-niň, Türkiýäniň, Ermenistanyň işewürleri jemi bahasy 7 million 868 müň manatlykdan gowrak nah ýüplügi we haly önümlerini satyn aldylar.
Ýurdumyzyň telekeçileri içerki bazar üçin jemi bahasy 2 million 200 müň manatlykdan gowrak bolan polipropileni satyn aldylar.