BSGG-niň ýolbaşçysy koronawirus bilen bagly dünýä ýagdaýynyň ýaramazlaşýandygyny duýdurdy

Dünýäde koronawirus keseliniň ýaýrawy bilen bagly ýagdaý ýaramazlaşmagyny dowam etdirýär. Bu barada Bütindünýä saglygy goraýyş guramasynyň ýolbaşçysy Tedros Adhanom Gebreýesus habar berýär, muny iz.ru ýetirýär.
Ol soňky wagtlarda epidemiologik ýagdaýyň gowulaşmagynyň Ýewropa Bileleşiginiň ýurtlarynda bellige alynýandygyny, ýöne dünýä möçberinde ýagdaýyň ýaramazdygyny belledi.
“BSGG dünýäde koronawirus bilen 7 mln keselleme ýagdaýy we 400 müň ölüm barada habar aldy. Ýewropada ýagdaýyň gowulaşýandygyna garamazdan, dünýä möçberinde ol ýaramazlaşýar” – diýip, TACC Gebreýesusyň Ženewadaky brifingde aýdan sözlerini getirýär.
Ol soňky 10 günüň dokuz gününiň içinde dünýäde her günde 100 müňden gowrak täze kesellileriň hasaba alnandygyny ýatlatdy. 7-nji iýunda bu görkeziji bir gije-gündizde 136 müňden geçdi.
Onuň aýtmagyna görä, bu ýagdaýlaryň tas dörtden üç bölegi 10 sany döwlete degişli boldy, esasanam, Amerika we Günorta Aziýa. Şeýle-de, Gebreýesus Afrikanyň köp döwletlerinde, Gündogar Ýewropanyň we Merkezi Aziýanyň ýerlerinde keselleme ýagdaýynyň ýokarlanandygyny belledi.
Gebreýesus 9-njy iýunda BSGG-niň koronawirus bilen kesellän adamlaryň sagdyn adamlar bilen aragatnaşygyna gözegçilik etmek meselesi boýunça onlaýn-maslahata çagyrýandygyny aýtdy. “BSGG COVID-19 bilen keselleme boýunça aragatnaşyklary yzarlamak boýunça sanly tehnologiýada innowasiýalardan başlap, tehniki we operasion tejribeler bilen paýlaşmak üçin onlaýn-maslahata çagyrýar”. BSGG-niň ýolbaşçysy aragatnaşyklary yzarlamagyň pandemiýa “jogap bermekde esasy element bolup durýandygyny” belledi. Ýöne gözegçiligiň sanly enjamlary “şahsy durmuş üçin problematik bolup biler”. “Aragatnaşyklara gözegçilik etmek üçin bu enjamlaryň netijeliligi barada köpräk maglumat gerek. Biz ýurtlary bu maglumatlary ýygnamaga we şonuň bilen birlikde bilimleriň global bazasyna goşant goşmaga çagyrýarys” – diýip, Gebreýesus aýdýar.
Bu keseliň dörän ýeri Hytaýyň Uhan şäheri boldy. Birnäçe aýyň içinde bu kesel dünýäniň 210-dan gowrak döwletini gurşap aldy.