Ýapon alymlary koronawirusy “akylly” matanyň kömegi bilen ýeňmekçi bolýarlar

Ýaponiýada alymlar, olaryň aýtmagyna görä, koronawirusy ýeňip bilmäge ukyply bolan matany döretdiler. Bu özboluşly iş barada “Popular Mechanics” amerikan neşirine salgylanyp, chto-proishodit.ru ýetirýär.
Işiň awtorlarynyň aýtmagyna görä, bu matadan taýýarlanylan maskalar häzirki wagtda koronawirus keselinden goranmak üçin adamlaryň köpüsi tarapyndan ulanylýan maskalara garanda, has netijeli. Bu matanyň aýratynlygy onuň howply mikroorganizmleriň hereketine böwet bolujylyk häsiýetine eýediginden ybarat. Bu özboluşly matany Ýaponiýanyň alymlary PIECLEX diýip atlandyrdylar.
Matanyň aýratynlygy onuň hem bakteriýalary, hem wiruslary ýok edýän hereketsiz elektrik güýjüni almak üçin adamyň kinetiki energiýasyny ulanyp bilýänligindedir.
Özboluşly “antibakterial” matany döretmegiň üstünde Murata Manufacturing we Teijin Frontier kompaniýalarynyň işgärleri iş alyp bardylar. Olar özleriniň döreden dokma önüminiň eýýäm barlagdan geçirilen ähli wiruslary we bakteriýalary 99,9% ýok edip biljekdigini habar berýärler.
Häzir PIECLEX matasynyň barlagdan üstünlikli geçýändigine garamazdan, onuň netijeliligi barada gutarnykly karara gelmäge hünärmenler gyssanmaýarlar. Ýapon alymlary koronawirus keselinden 100% gorap biljek materialy döretmekçi bolýarlar. Ýöne onuň haçan taýýar boljakdygyny olar heniz aýdyp bilenoklar, sebäbi olaryň aýtmagyna görä, mikroorganizmleri barlagda ulanmak üçin olaryň nusgalary hemişe elýeterli bolup duranok.
“PIECLEX ýaly biologiki we himiki gorag örtüklerini, belli bolşy ýaly, döretmek kyn, onuň sebäbi hem tehnologiýanyň ýoklugynda däl-de, goranmaly bolan mikrooganizmleriň nusgalaryna elýeterliligiň kynlygynda” – diýip, neşiriň awtory hem belleýär.
Häzirlikçe bolsa hünärmenler goragyň barlanylan, adaty usullaryna biwerpaý garamazlygy maslahat berýärler: eliňi gowy ýuwmaly, maska dakynmaly we jemgyýetçilik ýerlerinde sosial aradaşlygy berjaý etmeli.