Beýik Britaniýada ulaglaryň önümçiligini sakladylar

Awtoöndürijileriň we satyjylaryň britan jemgyýetiniň maglumatlaryna laýyklykda, Beýik Britaniýada geçen aýda geçen ýyldaky 71 müň bilen deňeşdirilende bary-ýogy 197 awto ýygnaldy. Bu barada 32cars.ru habar berýär. Içki bazar üçin awtolaryň önümçiligi hem tas 99,7% kemeldi. Şeýle iş ýagdaýyny analitikler COVID-19 keseliniň ýaýrawy esasynda kärhanalaryň saklanylmagy we serhetleriň ýapylmagy bilen düşündirýärler. Şunuň bilen birlikde britan awtobazaryna breksitiň (Beýik Britaniýanyň Ýewropa Bileleşiginden çykmagy) we ABŞ-nyň Hytaý bilen söwda urşunyň netijesi hem öz täsirini ýetirýär. Awtomobil sektorlarynyň çökmesi Britaniýanyň tutuş ykdysadyýetine uly urgy bolar diýip, hünärmenler hasaplaýarlar.
“Aprel aýynda britan awtomobil kärhanalarynyň togtadylandygy sebäpli, bu görkezijiler geň däldir, ýöne olar hakykatdan hem pudagyň çaknyşýan uly meselelerine şaýatlyk edýär, geçen aýda onda girdejiler hakykatda nola çenli kemeldi” – diýip, SMMT-niň ýerine ýetiriji müdiri Maýk Houz aýdýar.
Guramanyň hasaplamasy boýunça, 2020-nji ýylda Beýik Britaniýada 1 mln awtomobilden az çykarylar. Ýaramaz ösüşiň esasy sebäbi koronawirus pandemiýasynyň täsirinden ybaratdyr. Ýurt kesellänleriň sany boýunça dünýäde dördünji orny eýeleýär. Karantin çäreleriniň biri hökmünde hökümet serhetleri ýapdy. Bu bolsa eksportuň saklanmagyna getirdi we awtomobil senagatyna uly urgy urdy.
Awtoönümçiligiň pese gaçmagy dünýäniň köp döwletlerinde bellige alynýar. Argus analitik agentliginiň maglumatlary boýunça, Ýaponiýada aprel aýynyň jemi boýunça ulag serişdeleriniň goýberilişi ýyllyk hasabynda 47%, ýagny 412,5 müňe çenli kemeldi. Germaniýada we ABŞ-da pese gaçyş 90%-den geçdi, ýöne önümçiligiň göwrümi Britaniýanyňkydan ýokary bolmagynda galdy, ýagny degişlilikde, 10,9 we 10,3 müň.