Saud Arabystany aziýaly alyjylar üçin nebitiň iberilmegini kemeldýär

Saud Arabystany Aziýa bazary üçin nebitiň iberilmegini kemeldýär, bu barada Bloomberg agentligine salgylanmak bilen vesti.ru habar berýär.
Saudi Aramco döwlet nebit kompaniýasy Aziýadaky azyndan 12 müşderisi üçin iýunda şertnama boýunça nebiti ýola goýma möçberini kemeltdi. Sebitdäki beýleki üç satyn alyjylar nebitiň soralan möçberine eýe boldular.
12 sany nebiti gaýtadan işleýjileriň 8-si kemeltmäniň ep-eslidigini, ýagny 20-30% we ondan hem ýokarydygyny habar etdiler. Bu kemeltmeleriň esasy bölegi Hytaýdaky we Hindistandaky alyjylaryň paýyna düşýär. Olaryň käbirleri nebiti köp alyp biler ýaly Aramco bilen gepleşikleri geçirýändiklerini habar berdiler.
Öň, Saud Arabystanynyň energetika Ministrligi Saudi Aramco kompaniýasyna nebiti gazyp alyjylygy iýunda OPEK+ şertnamasynyň çäklerinde ylalaşylan kemeltmä goşmaça hökmünde günde 1 mln barrel kemeltmegi tabşyrdy. Bu koronawirus pandemiýasyna garşy göreş üçin girizilen çäklendirmeleriň gowşadylmagynyň islegiň artmagyna getirýän wagty, nebit bazarynda deňagramlylygyň dikelmegine ýardam bermeli.
Saud Arabystanynyň nebit önümçiligi aprel aýynda bir gije-gündiziň dowamynda 12,3 mln barrele ýetdi. Şeýlelikde, iýunda nebit çykarylmasynyň umumy kemeltmesi günde 4,8 mln barrele barabar bolar.
Bloomberg agentligi Saudi Aramco kompaniýasynyň ABŞ we Ýewropa üçinem nebit bilen üpjünçiligiň göwrümini kemeltjekdigini belleýär, bu ýerde bolsa ýola goýmanyň 60-70% kemeldiljekdigi bellenilýär.