Türkmenistanyň Daşary işler ministrliginde onlaýn tertibinde geçirilen duşuşykda dünýäde ýaýran ýokanç keseliň ýurdumyzyň durmuş-ykdysady ýagdaýyna, şol sanda makro we mikro ykdysady görkezijilerine täsiri bilen baglanyşykly meseleler ara alnyp maslahatlaşyldy. Oňa BMG-niň ýurdumyzdaky düzümleýin bölümleriniň we halkara maliýe guramalarynyň wekilleri çagyryldy.
Çykyşlarda bellenilişi ýaly, häzirki döwürde tutuş dünýäde bolşy ýaly, Türkmenistanda hem СOVID-19 ýokanjynyň milli ykdysadyýetimize ýaramaz täsiriniň öňüni almak maksady bilen zerur işleri alyp barmak wajyp bolup durýar.
Şunuň bilen baglylykda, Prezident Gurbanguly Berdimuhamedow içerki önümçiligiň ýokary ösüş depginini üpjün etmek, senagat taýdan üpjünçilik derejesini ýokarlandyrmak, kiçi we orta telekeçilige goldaw bermek boýunça gyssagly we orta möhletleýin çäreleri işläp taýýarlamagy hem-de olar boýunça degişli çözgütleri kabul etmegi hökümetiň işiniň esasy ugurlarynyň biri hökmünde kesgitledi.
Bu ugurda amala aşyrylýan çäreler halk hojalygy toplumynyň pudaklarynyň durnukly ösüşini saklamaga mümkinçilik berýär. Türkmen tarapynyň wekilleri mysal hökmünde şu ýylyň dört aýynda ýerine ýetirilen işleriň netijeli häsiýete eýe bolandygyny tassyklaýan makroykdysady görkezijileri beýan etdiler.
Türkmenistan СOVID-19 ýokanjynyň milli ykdysadyýete täsiri bilen bagly meseleleri maslahatlaşdy
- 14.05.2020 23:56
- 13k+
