Daşary ýurtly bilermen türkmen talyplaryna onlaýn sapak geçdi

29-njy aprelde Halkara ynsanperwer ylymlary we ösüş uniwersitetinde onlaýn-görnüşde Ýadro synaglaryň hemmetaraplaýyn gadagan edilmegi hakyndaky Şertnama Guramasynyň Ýerine ýetiriji sekretary Lassina Zerbo «Parahatçylyk, howpsuzlyk we ösüş ugrunda halkara hyzmatdaşlyk: Türkmenistanyň Bitaraplygynyň 25 ýyllygy» diýen mowzuk boýunça beýan okady. Bu ýokary okuw mekdebiň hem-de Halkara gatnaşyklary institutynyň talyplary, şeýle hem DIM-niň wekilleri onuň diňleýjileri boldular.
Lassina Zerbonyň belleýşi ýaly, Türkmenistanyň daşary syýasy ösüş nusgasyny seçip almagynyň milli bähbitlere, dünýä bileleşiginiň uzakmöhletleýin maksatlaryna hem-de BMG-niň Tertipnamasynyň ýörelgelerine kybap gelýändigini ynamly aýtmak bolar.
Beýanyň dowamynda bellenilişi ýaly, ýaragsyzlanmak hem-de köpçülikleýin gyryş ýaragyny ýaýratmazlyk meselelerinde Prezident Gurbanguly Berdimuhamedowyň ýolbaşçylygynda işlenip taýýarlanylan Türkmenistanyň alyp barýan ugry aýdyň we takyk bolup durýar.
Şunuň bilen baglylykda, Lassina Zerbo Türkmen döwletiniň alyp barýan ugruna ýokary baha berdi. Türkmenistan ähmiýetli halkara-hukuk resminamalaryna, ilkinji nobatda, BMG-niň ýaragsyzlanmak meseleleri boýunça konwensiýalaryna goşulmak bilen, durnuklylygy we ählumumy howpsuzlygy üpjün etmek boýunça umumy dünýä proseslerine işjeň gatnaşýar.
Beýan tamamlanandan soň, diňleýjilere onlaýn-görnüşde guramanyň Ýerine ýetiriji sekretaryna sowallary bermek mümkinçiligi döredildi.