London uniwersitetiniň professory türkmen talyplaryna onlaýn sapak geçdi

Halkara gatnaşyklary institutynyň maslahatlar zalynda sanly wideoaragatnaşyk arkaly guralan «ÝUNESKO: Ýüpek ýollary we gadymy Merwiň tutýan wajyp orny» atly çykyşda «University College of London» ýokary okuw mekdebiniň Arheologiýa institutynyň professory, ÝUNESKO-nyň ýüpek ýollary boýunça baş maslahatçysy Timoti Uilliýams çykyş etdi. Ol ýurdumyzyň çäginde bilelikdäki arheologik ekspedisiýalaryň işine ençeme gezek gatnaşdy.
Gadymy Merw köp ýyllaryň dowamynda alymda uly gyzyklanma döredýär. Onuň ýolbaşçylygynda London uniwersitetiniň Arheologiýa institutynda ýörite taslama durmuşa geçirilýär.
Çykyşyň dowamynda Gadymy Merwiň gymmatlyklary, onuň suwaryş ulgamlarynyň aýratynlyklary, Murgap derýasynyň orny we beýlekiler barada durlup geçildi. Professor häzirki zaman geomorfologik barlaglaryň, paleografiýa, aero we älem kartografiýasy ulgamynda gazanylanlaryň ähmiýetini nygtady.
Arheologik barlaglar Ýewropanyň we Hytaýyň arasyndaky kerwen ýollary emele gelmezinden iki müň ýyl ozal bu ýerde eýýäm Marguşy Hindistanyň we Mesepotamiýanyň gadymy siwilizasiýalary bilen birleşdiren söwda ýollary bolupdyr. Kerwen ýollary häzirki Türkmenistanyň ep-esli çäginden geçipdir.
Halkara gatnaşyklary institutynyň hem-de Halkara ynsanperwer ylymlary we ösüş uniwersitetiniň talyplarynyň hem-de mugallymlarynyň öňünde guralan çykyş tamamlanandan soň, diňleýjilere sanly wideoaragatnaşyk arkaly alyma sowallary bermek mümkinçiligi döredildi.