Ýewropanyň awtomobil senagaty durgunlykdan çykýar

Ýewropa awtosenagaty bir aý hereketsizlikden soň ýokary howpsuzlyk şertlerinde önümçilige dolanýar, bu barada Euronews habar berýär. Renault kompaniýasynyň topary Fransiýanyň Le-Man şäherindäki kärhanasyny açdy. Öň, Renault-nyň Rumyniýada ýerleşýän Dacia konweýeri işe girizilipdi. Italiýadaky Ferrari kärhanasynda 4000 sany işgär yzygiderli medisina gözegçiliginden geçýärler. Wengriýadaky Suzuki kärhanasy özüniň işini öňümizdäki hepdede dikelder.
Toyota-nyň Fransiýadaky kärhanasynda işçiler öň sargyt edilen 35 müň awtomobiliň önümçiligine başladylar. Kärhananyň işgäri Marion Makrez şeýle belleýär: “Öň işçiler ýüzbe-ýüz durýardylar. Biz bir metr aralygy saklar ýaly we hemmeler üçin zähmet şertlerini howpsuzlandyrar ýaly gorag barýerlerini oturtdyk”.
Ýewropada önümçilik togtadylandan soň awtomobil kärhanalarynda 1 mln töweregi adam işden çykaryldy ýa-da gysgaldylan iş grafigine geçirildi, bu işçileriň üçden bir bölegi. Umuman alanyňda, önümçiligiň ýitgisi 2 mln ulag serişdelerinden gowrak diýlip kesgitlenilýär.
Ýewropa awtobazarynda satuw geçen aýda 55% pese gaçdy, Fransiýada bu görkeziji 72,2%-e barabar boldy.Şeýle fonda Volkswagen nemes awtokonserniniň hem kärhanalary tapgyrlaýyn açylyp başlandy, onuň Seat ispan bölümçesinde 15 000 işgär işe başlamazdan ozal koronawirus üçin testden geçiriler.