Türkmenistanyň Prezidenti Aşgabadyň merkezindäki seýilgäh zolagynyň abadanlaşdyrylyşy bilen tanyşdy

24-nji aprelde Gurbanguly Berdimuhamedow wise-premýer Ş.Durdylyýewiň hem-de Aşgabat şäheriniň häkimi Ý.Gylyjowyň haýyşy boýunça paýtagtymyzyň merkezinde bina edilen behişdi bedewlerimiziň heýkeliniň abadanlaşdyryş işleri bilen tanyşdy.
Bu ýerde alnyp barylýan işler bilen tanşyp, döwlet Baştutany at heýkellerini abadanlaşdyrmak işleriniň toplumlaýyn esasda ýerine ýetirilmelidigine ünsi çekdi we onuň yşyklandyryş ulgamyna möhüm ähmiýet berilmegini tabşyrdy.
Şeýle hem türkmen Lideri şäheri abadanlaşdyrmak bilen baglanyşykly meseleleriň çözgüdine oýlanyşykly çemeleşilmelidigini aýdyp, bu ýerdäki we beýleki seýilgäh zolaklaryny mundan beýläk-de abadanlaşdyrmak, onuň çäklerinde dürli gülleri ekmek işlerini tomus möwsümine çenli tamamlamagy tabşyrdy.
Paýtagtymyzyň merkezinden uzap gidýän seýilgäh zolagynyň aýratynlygyny belläp, döwlet Baştutanymyz häzirki döwürde onuň günbatar çetinde döwrebap söwda merkeziniň gurluşygynyň alnyp barylýandygyny aýtdy.
Şunuň bilen baglylykda, hormatly Prezidentimiz paýtagtymyzyň bu künjegindäki desgalaryň, binalaryň we söwda merkeziniň seýilgäh zolagy bilen bir bitewi sazlaşygy emele getirmegi üçin zerur tagallalaryň edilmelidigini belledi we bu babatda wise-premýere hem-de Aşgabat şäheriniň häkimine birnäçe anyk tabşyryklary berdi.