Toyota, Renault we Volkswagen Ýewropada önümçiligi dikeldýärler

Dünýäniň birnäçe öňdebaryjy awtoöndürijileri bir aý arakesmeden soň Ýewropada kärhanalaryny ýene-de açyp başladylar, bu barada “Financial Times” neşirine salgylanmak bilen vesti.ru habar berýär.
Awtomobil kompaniýalary soňlugy bilen pandemiýa öwrülen COVID-19 koronawirus ýaýrawynyň esasynda Ýewropada önümçiligi saklamaly boldular.
Toyota, Renault, Hyundai, Volkswagen we Volvo geçen aý ýapylan obýektlerde önümçiligi dikelden ýa-da indi dikeltmäge taýýarlanýan kompaniýalaryň hataryna girýärler. Şonuň bilen birlikde, Jaguar Land Rover-den başlap, beýleki awtoöndürijiler bolsa öz kärhanalaryny işe girizmek boýunça meýilnamalarynyň möhletini uzaldýarlar.
VW Audi brendi sişenbe güni hereketlendirijileriň önümçiligi boýunça özüniň Dýeradaky, Wengriýadaky kärhanalarynda çäkli önümçilige başlady, ýöne özüniň ýurtda esasy awtomobil önümçiligini işe girizmedi. 13 müň töweregi adam işleýän bu kärhana 22-nji martda saklanylypdy. Brendiň ýolbaşçylygy ýakyn hepdelerde kärhana doly önümçilige başlar diýip umyt edýärler. Häzirki wagtda kärhanada sistema döredilýär, onuň esasynda işgärler koronawirusdan maksimal goraglylyga eýe bolarlar: ýygnaýjy liniýalarda işgärleriň arasynda howpsuz distansiýa berjaý ediler, işgärleri kärhana ýörite awtobuslar gatnadar.
Hyundai özüniň Çehiýadaky awtomobil kärhanasynda önümlerini çykarmak işlerini dikeldip başlady, ýöne doly derejede däl.
Volvo Cars Torslandda, Şwesiýada indiki duşenbe güni özüniň flagman kärhanasyny ýene-de açmagy meýilleşdirýär.
Renault-yň önümçiligi Portugaliýada eýýäm başlady, indi fransuz awtokonserni indiki hepdede özüniň rumyn kärhanasyny açyp biler.
Koronawirus pandemiýasy bilen baglylykda, awtoöndürijiler satuwyň pese gaçmasy bilen çaknyşarlar, muny Bloomberg kompaniýasynyň analitigi belleýär. Onuň pikiriçe, 2020-nji ýylda ýewropa bazarynda satuwlar 3 mln awtomobil derejesinde pese düşer, kompaniýalar 60 mlrd ýewrodan mahrum bolarlar.