Ferrari her ulagynyň satuwyndan Nissana garanda 926 esse köp gazanýar

Ferrari özüniň her ulagynyň satuwyndan Nissana garanda 926 esse köp gazanýar diýip, Car Industry Analysis portalyna salgylanmak bilen tarantas.news habar berýär.
Meselem, BMW markasyna Ferrariniň bir superkaryny satmak bilen gazanýanyny gazanmak üçin ortaça 30 ulagy satmak gerek bolýar. Beýleki awtoöndürijilerde bu gatnaşyk has ýokary: Toyota brendi Ferrariniň satylan bir modelinden gelýän girdejisi bilen deňleşdirmek üçin 44 awtomobili, Volkswagen – 56 ulagy, Mercedes-Benz bolsa 67 awtomobili satmaly bolýar. Iň haýran galdyryjy görkeziji Nissan bilen Ford brendlerine degişli, ýagny Ford 905 sany, Nissan 926 sany awtomobili satmaly bolýar.
Bir zady belläp geçmeli, geçen ýyl lýuks brendi Ferrari üçin satuw boýunça rekordly ýyl boldy. Kompaniýa öz taryhynda ilkinji gezek 10 müňden gowrak awtomobili satmagy başardy, has anyk aýtsak, 10 müň 131 superkar, bu bolsa 2018-nji ýyla garanda 9,5% ýokarydyr. Olardan 4895 sany ulag Ýewropadaky, Afrikadaky we Ýakyn Gündogardaky müşderiler tarapyndan satyn alyndy, 2900 sany awtomobil Demirgazyk we Günorta Amerika, 836-sy Hytaýa, Gonkonga we Taýwana iberildi. Netijede, geçen ýyl markanyň arassa girdejisi 10,1% ýokarlandy we 3,7 mlrd ýewro barabar boldy. Gazanylan pul brendiň ilkinji krossowerinden başlap, täze modelleri taýýarlamaklyga sarp ediler. Ferrariniň baş inženeri Maýkl Leýters täze bäşmetrli modeliň häzir lýuks segmentinde hödürlenilýän hemmetaraplaýyn ulaglaryň hemmesinden düýpli tapawutlanjakdygyny habar berdi. Kompaniýanyň ilkinji krossoweriniň premýerasy 2022-nji ýylda geçiriler.