D witamine baý önümler ýürege peýda getirýär

D witamininiň ýokary düzümini saklaýan önümler ýürek-damar sistemasynyň işine oňaýly täsir edýär we ony goraýar, muny Gresiýadaky Arokopio uniwersitetiniň alymlary anykladylar. Olaryň gelen netijeleri MedicalXpress žurnalynda neşir edildi, bu barada ria.ru saýty habar berýär.
Ylmy topar 11 ýyllap üç müňden gowrak erkekleriň we aýallaryň saglygy hem-de iýmitlenişi baradaky maglumatlary seljerdiler. Şonda D witaminine baý bolan önümleri köp iýýän adamlarda ýürek-damar keseliniň howpunyň minimal derejededigi anyklanyldy. Şeýle adamlaryň rasionyna ýagly balyk, ýumurtga, peýnir, mesge we beýleki önümler girýärdi.
Eksperiment wagtynda şeýle witamini kabul etmegiň pes derejeli toparynda erkek adamlaryň 24%-inde we aýallaryň 14%-inde infarkt, insult ýa-da beýleki ýürek keselleri ýüze çykdy. Ortaça derejeli gatnaşyjylarda bu görkeziji 17%-e we 10%-e çenli peseldi. Rasionynda bu aktiw maddanyň ýokary düzümine eýe bolan önümleri saklaýan meýletinçileriň arasynda ýürek bilen bagly meseleler erkekleriň 12%-inde, aýallaryň 11%-inde hasaba alyndy.
Alymlar D witaminini iýmitden kabul etmegi maslahat berýärler, çünki şeýle ýagdaýda ol has köp peýda getirýär.
“Ýürek myşsalarynyň saglygyna ortaça ýa-da bitarap täsiri görkezen D witaminini goşmaça etmek bilen geçirilen barlaglardan tapawutlylykda, bu barlag D witamininiň iýmitden köp kabul edilmeginiň, esasan, erkeklerde ýüze çykýan ýürek bilen bagly meselelerden gorap bilýändigini görkezdi” diýip makalada aýdylýar.