LADA özüniň 50 ýyllyk ýubileýini belleýär

2020-nji ýylyň 19-njy aprelinde LADA awtomobilleriniň öndürilip başlananyna 50 ýyl dolýar. 1970-nji ýylyň 18-inden 19-yna geçilýän gijede Wolžsk awtokärhanasy ВАЗ-2101 “Žiguli” modeliniň ilkinji alty sedanyny çykardy, bu barada brendiň metbugat gullugyna salgylanmak bilen avtonovostidnya.ru habar berýär.
LADA-nyň ilkinji modeli diňe bir “АвтоВАЗ” kompaniýasynyň taryhynda däl-de, eýsem Russiýanyň awtosenagatynyň taryhynda giňden ýaýran model boldy. 1970-nji ýyldan 1988-nji ýyllar aralygynda Wolžsk awtokärhanasynyň konweýerinden 4,8 million sany ВАЗ-2101 (“Kopeýka”) awtomobili we onuň modifikasiýalary çykdy. Belläp geçsek, bu rekord häli-häzire çenli täzelenilenok.
ВАЗ-2101 awtomobili 1967-nji ýylda “Ýewropada ýylyň awtomobili” diýen hormatly ada mynasyp bolan Fiat-124 italýan sedanynyň esasynda gurlan. Önümçilige goýberilmezinden we Russiýada satylyp başlanmazyndan öň ol birnäçe synaglardan geçirildi we onuň konstruksiýasyna 800-den gowrak üýtgeşme girizildi.
Netijede hem ýerli satyn alyjylar tarapyndan, hem-de daşary ýurt bazarynda ýokary baha mynasyp bolan ygtybarly we rahat awtomobil peýda boldy.
ВАЗ-2101 modifikasiýasy 1982-nji ýyla çenli çykaryldy, 21011 wersiýasy konweýerden 1983-nji ýyla çenli çykdy, 21013 wersiýasy bolsa 1988-nji ýyla çenli dowam etdirildi. Eger-de Žiguli klassyky maşgalasynyň wekilleriniň ählisiniň bir binýatda esaslandyrylandygy baradaky fakty göz öňünde tutsak, onda bu seriýanyň awtomobilleriniň öz “ýoluny” 2012-nji ýylda, ýagny Ižewsk awtokärhanasynyň konweýerinden ВАЗ-2107-niň soňky nusgasy çykarylan wagtynda bes etdi diýip aýtmak bolar.