Tesla ýylyň birinji çärýeginde 88 müňden gowrak elektromobili satdy

Tesla amerikan kompaniýasy şu ýylyň birinji çärýeginde satyn alyjylara öz elektromobilleriniň 88 müňden gowragyny satdy. Degişli maglumatlar kompaniýa tarapyndan penşenbe güni neşir edilen önümçiligiň göwrümi we ýola goýluşy boýunça çärýek hasabatynda saklanylýar.
Täze koronawirus pandemiýasyna garamazdan, 2020-nji ýylyň ilkinji üç aýynda Tesla öz satyn alyjylaryna 88 400 sany elektromobili satdy. Olaryň köp bölegini, ýagny 76 200 sanysyny has ykjam bolan Model 3 we Model Y elektromobilleri düzýär. Mundan başga-da, Model S we Model X-den 12 200 sany elektromobil satyldy. Bu markanyň taryhynda iň üstünlikli birinji çärýek boldy. Rekord Şanhaýda kärhananyň açylmagy we Tesla Model Y elektromobiliniň wagtyndan öň satylyp başlanmagy bilen gazanyldy, diýip ТАСС habar berýär.
Teslanyň kärhanalarynyň tutuş dünýä boýunça umumy önümçiligi ýylyň birinji çärýeginde 102 672 elektromobile barabar boldy. “Bu biziň birinji çärýek boýunça iň gowy görkezijimiz” – diýlip, Palo-Altoda (Kaliforniýa ştaty) esaslandyrylan kompaniýanyň bildirişinde görkezilýär. Geçen ýyl oňa konweýerden 77 100 sany awtomobili çykarmak başartdy, olardan 63 müňüsi satyldy.
Eger-de Tesla şu dinamikany saklasa, onda häzirki çärýekde önümçiligiň 120 müň awtomobile çenli artmagyna garaşmak bolýar. Ýanwar-mart girdejileri boýunça hasabat apreliň ahyrynda berilýär. 
Tesla telekeçi Ilon Mask tarapyndan 2003-nji ýylda esaslandyryldy. Kompaniýanyň ştab kwartirasy Palo-Altoda ýerleşýär. Ilkibaşda bu firma elektromobilleriň önümçiligine ýöriteleşdirildi, ýöne soňrak kompaniýa Gün batareýlerini we beýleki energiýa toplaýjy sistemalary döretmek bilen hem meşgullanyp başlady.