Changan martda sürüjisiz awtomobilleriň seriýaly önümçiligine girişer

Hytaýyň Changan Automobile awtomobil gurluşyk kompaniýasy 2020-nji ýylyň martynda sürüjisiz awtomobilleriň seriýaly çykarylyşyna başlamaga taýýarlanýar. Üçünji derejeli awtonom dolandyryş sistemasy täze UNI-T krossowerine oturdylar, bu barada abnews.ru habar berýär.
Changan-yň krossoweriniň halkara premýerasy 5-nji martda Hytaýda geçirildi. UNI-T krossowerini awtomobil kompaniýasynyň ýolbaşçysy onlaýn-translýasiýa görnüşinde hödürledi.
Täze krossower 5 millimetrlik gysga tolkunly we 12 sany ultra-ses datçiklerine eýe boldy. 6 kamera bilen bilelikde olar sistema real wagt režiminde 360 gradus üç ölçegli kartany döretmäge mümkinçilik berýärler.
Bu enjam ýoldaky ähli böwetleri 200 metr radiusda görmäge mümkinçilik berýär. Ulagyň datçikleri ýol belgilerinden, nyşanlaryndan, beýleki ulag serişdelerinden, geçelgelerden we welosipedçilerden başlap, islendik obýekti 10 santimetr çenli takyklykda bellige almaga ukyply. 
Changan özüni üçünji derejeli awtonom dolandyryş tehnologiýasy bilen üpjün edilen awtomobillerini köpçülikleýin öndüriji ilkinji hytaý kompaniýasy diýip atlandyrýar.
Awtonom dolandyryşyň jemi 0-dan 5-e çenli 6 derejesi aýratynlandyrylýar. Bar bolan klassifikasiýa laýyklykda üçünji dereje awtomobile dürli ýol şertlerinde özbaşdak hereket etmäge mümkinçilik berýän ýokary awtonomlyga degişli. Sürüji UNI-T-ni diňe adatdan daşary ýagdaý ýüze çykanda dolandyrar.
Awtomatlaşdyrmanyň birinji derejesi diňe sürüjä kömek bermegi göz öňünde tutýar (meselem, adaptiw kruiz-kontrol). Awtomatlaşdyrmanyň ikinji derejesinde sürüji ruldan elini wagtlaýyn aýryp bilýär, ýöne ol gyssagly ýagdaý ýüze çykanda dolandyryşy öz eline almak üçin mydama ýola üns bermeli.
Öň, Honda Motor kompaniýasynyň bazara 2020-nji ýylyň ortalarynda üçünji derejeli awtomatlaşdyrma bilen awtomobili çykarmagy meýilleşdirýändigi belli boldy. Bu kompaniýanyň ýapon öndürijilerinden şeýle awtomobilleri ilkinji bolup ýola goýmagyna garaşylýar.