Samsung kompaniýasy displeýleriň täze neslini öndürmekçi bolýar

Samsung kompaniýasynyň PIFF atly täze söwda markasyny bellige aldyrmakçy bolýandygy belli boldy. Hut şu brendiň esasynda indi AMOLED-iň ýerini tutjak smartfonlar üçin düýbünden täze döwrebap innowasion displeýler öndüriler. Bu barada live24.ru habar berýär.
AMOLED displeýi Samsung kompaniýasy tarapyndan 12 ýyl mundan öň tanyşdyrylypdy, oňa eýe bolan ilkinji gurluş hem Nokia N85-di. Şondan bäri bu displeýler uly meşhurlyga eýe boldy we häzirki wagtda ol köp gajetlerde ulanylýar. Onuň yzysüre öndüriji Super AMOLED we Dynamic AMOLED displeýlerini anons etdi. Bularyň ikisi hem meňzeş, ýöne soňky HDR10+ dinamiki diapazonyny göterýär. Displeýiň bu görnüşine Galaxy S10 we has soňky smartfonlar eýe boldy.
PIFF ady eýýäm Intellektual emlägiň WIPO Bütindünýä guramasynyň sanawynda bellenildi. Häzirki wagtda Samsung talapnamany patenti resmileşdirmek üçin USPTO Edarasyna iberdi.
Resminamada “beýany” ýazgysynda diňe smartfonlar üçin displeý diýen ýekeje häsiýetnama görkezilen. Galan maglumatlar heniz belli däl. Täze dewaýsy söýüjiler “akylly” telefonlaryň kämilleşdirilen ekrany baradaky täzeliklere sabyrsyzlyk bilen garaşýarlar.
Käbirleri eýýäm Samsung-yň önüminiň binýadynda täze nesliň telefonyna eýe bolyjynyň islegi boýunça öwrülýän we formasyny üýtgedýän “maýyşgak” ekran ideýasynyň ýatandygyny çaklaýarlar. Beýlekiler smartfonda mümkin gizlin selfi-kamera oturdylandyr diýen pikiri aýdýarlar. Ýöne beýle etmek nämä gerek – bu düşnüksiz.
2019-njy ýylda Samsung kompaniýasyna gajetleri öndürijileriň ählumumy reýtinginde 1-nji orny eýelemek başartdy. Şeýlelik bilen, Samsung-yň umumy satuw paýy tas 21%-e barabar boldy.