Russiýa Türkmenistana COVID-19-y anyklamak üçin test-sistemalaryny berdi

Türkmenistan koronawirusy anyklamak üçin Russiýadan test-sistemalaryny aldy, diýip ORIENT Ria Nowosti agentliginiň Rospotrebnadzoryň saýtyna salgylanyp berýän habaryny getirýär. Türkmenistandan başga-da, Rospotrebnadzor tarapyndan işlenip düzülen test-sistemalaryny Eýran, Azerbaýjan, Özbegistan, Täjigistan, Mongoliýa we KHDR aldy.
COVID-19 täze koronawirusyny barlaghana şertlerinde anyklamak üçin jemi 800-den gowrak test-sistemalary berildi. Olar hünärmenlere 80 müň sany barlag geçirmäge mümkinçilik berer.
Çylşyrymly epidemiologik ýagdaý ýüze çykan Eýrana aýratyn kömek berildi. «Täze koronawirus ýokanjynyň ýaýramagy zerarly Eýran Yslam Respublikasynda epidemiologik ýagdaýyň has hem kynlaşmagy bilen Rospotrebnadzor 50 müň sany barlag üçin 500 möçberde test-sistemalaryny muzdsuz esasda berdi» - diýlip guramanyň habarynda bellenilýär.
Türkmenistanyň DIM-inde ýakynda geçirilen brifingde ýurduň Saglygy goraýyş we derman senagaty ministri N.Amannepesow Türkmenistanda koronawirus keseliniň ýekeje ýagdaýynyň hem ýüze çykarylmandygyny aýtdy.
Bütindünýä saglygy goraýyş guramasy koronawirusyň täze görnüşi zerarly ýüze çykan keseliň ýaýramagyny pandemiýa diýip yglan etdi. Soňky maglumatlara görä, bu ýokanç kesel dünýäniň 100-den gowrak döwletinde ýüze çykaryldy, 120 müňden gowrak adam keselledi.