Mercedes-Benz çykarýan modelleriniň sanyny azaldar

EQ subbrendiniň elektromobilleriniň model hataryny giňeltmeklik kompaniýanyň markanyň “adaty” modellerini aradan aýyrmagyna getirýär.
Mercedes-Benz nemes kompaniýasy çykdajylary azaltmak bilen bagly meýilnamasyny durmuşa geçirmäge başlady. Bu barada Daimler birleşiginiň direktorlar geňeşiniň agzasy Markus Şefera salgylanmak bilen Autonews habar berýär. Şeferiň aýtmagyna görä, täze elektromobilleriň taslamasynyň, barlagdan geçirilmeleriniň we önümçiliginiň düýpli maýa goýumyny talap edýändigi üçin, kompaniýa käbir zatlardan ýüz öwürmeli bolýar. Ähmiýetli serişdeleri bolsa hususy platformada gurlan modellerden ýüz öwürmek bilen tygşytlamak bolýar. Häzirki günde ýeke-täk model üçin aýratyn arhitekturany döretmek düýbünden amatly däl.
Top-menejeriň aýtmagyna görä, optimizasiýanyň netijesinde brendiň çykarýan modelleriniň möçberi, şeýle-de awtomobil platformalarynyň we güýçli enjamlaryň sany azaldylar.
Häzirki wagtda nemes brendiniň lineýkasynda 45 model bar. Bu meýilnamanyň esasynda önümçilikden Mercedes-Benz S-klasynyň kupe we kabrioletiniň hem-de Mercedes-Benz X-klasynyň pikapynyň aýryljakdygy bellenilip geçilýär. Şeýle-de, konweýerden Mercedes-Benz B-klasynyň modeli gider diýlip çaklanylýar. Sanyny azaltmak meýilnamasyna G-Class, SL, AMG GT, S-Class girer.
Çykdajylar azaldylandan soň ulanyşdan galan serişdeleri täze modelleri, gibridleri we awtonom sistema dolandyryşly modelleri taýýarlamak işlerine gönükdirmek meýilleşdirilýär.
Öň, Mercedes-Benziň şu ýylda täze EQA elektrik krossowerini hödürlemegi meýilleşdirýändigi habar berildi.