Türkmenistanyň Prezidenti «Ene mähri» diýen hormatly ady dakmak hakynda Permana gol çekdi

Türkmenistanyň Prezidenti sekiz we şondan köp çagany dünýä inderen hem-de terbiýeläp ýetişdiren enelere Türkmenistanyň «Ene mähri» diýen hormatly adyny dakmak hakynda Permana gol çekdi. Bu ada mynasyp bolanlaryň doly sanawy bilen şu salgydan tanşyp bilersiňiz.
Resminamada bellenilişi ýaly, bu karar merdana ata-babalarymyzyň türkmen jemgyýetiniň sagdyn ösüşini esaslandyrýan maşgala ojagynda ene mähremligine aýratyn hormat goýup, ony mukaddeslige deňemek ýaly ajaýyp ýörelgelerinden ugur alyp, berkarar Watanymyzyň bagtyýar geljegini kepillendirýän mynasyp nesli ösdürip we terbiýeläp ýetişdirmekde belent başly enelerimiziň bitirýän ägirt uly hyzmatlaryny nazara almak bilen kabul edildi.
Ösüp gelýän nesillerimizi ata Watanymyza we merdana halkymyza wepaly, sagdyn hem-de ruhubelent adamlar edip ýetişdirmekde kalby mähirden doly eneleriň örän uly hyzmaty bardyr. Mukaddes maşgala ojagyny gorap saklamakda, ogul-gyzlaryna milli däp-dessurlarymyza laýyk edep-terbiýe bermekde, jemgyýetimizde agzybirligi berkitmekde olaryň bitirýän işleriniň bahasy ýokdur. Perzentlerine watansöýüjilik, ynsanperwerlik, lebzihalallyk we zähmetsöýerlik ýaly asylly häsiýetleri ündeýän, ýürekleri mähirden hem-de buýsançdan doly, yhlasly zähmeti bilen ata Watanymyzyň abraýyna abraý goşýan mähriban enelerimiziň sarpasy Garaşsyz döwletimizde belent tutulýar.