Toyota Hytaýda elektromobilleriň önümçiligi boýunça kärhana gurar

Toyota ýapon brendi Hytaýda elektrokarlaryň önümçiligi üçin kärhana gurmagy meýilleşdirýär.
Kompaniýanyň wekilleri täze kärhananyň üstündäki işleriň FAW Group guramasy bilen bilelikde alnyp baryljakdygyny mälim etdiler. Bu barada car.ru habar berýär.
Kärhana umumy bolar, ony Hytaýyň demirgazyk-gündogar şäheri Týanszinde ýerleşdirmek kararyna geldiler.
Belli bolşy ýaly, FAW Group kompaniýasy döwlet tarapyndan goldanylýar, şonuň üçin hem taýýarlanylýan taslama barada Hytaý hökümetine ýakyn bolan infarmatorlar gürrüň berdi.
Şeýle-de, kärhananyň gurluşygyna 1,2 milliard dollardan gowrak möçberde puluň sarp ediljekdigi barada maglumat peýda boldy. Ýöne taýýar kärhana her ýylda 200 müň töweregi elektrokarlary çykaryp biler.
Bu kärhananyň kömegi bilen korporasiýa dünýäniň iri awtomobil bazarynda satuwyň göwrümini artdyrmaga çalyşýar diýlip hasaplanylýar. Ýapon awtoöndürijisi täze kärhananyň gurluşygyny ýakyn ýyllarda tamamlamagy göz öňünde tutýar.
Hytaý ýapon kompaniýasy üçin esasy bazarlaryň biri bolmagynda galýar. 2019-njy ýylda HHR-de awtomobilleriň umumy önümçiligi 8,2% pese gaçdy, ýöne Toyota kompaniýasyna bu bazarda özüniň satuwyny ýyl hasaby boýunça 9% ýokarlandyrmak başartdy.
Toyota 2025-nji ýyla çenli elektromobilleriň we gibridleriň önümçiligini 5,5 milliondan hem geçirmegi göz öňünde tutýandygyny mälim etdi.