Leonardo da Winçiniň Luwrdaky sergisi muzeýiň ähli rekordyny täzeledi

24-nji fewralda Parižde italýan suratkeşiniň, derňewçisiniň we oýlap tapyjysynyň aradan çykanynyň 500 ýyllygyna bagyşlanan sergi tamamlandy. Leonardo da Winçä bagyşlanan bu sergä 1,1 mln töweregi adam bardy. Bu muzeýiň mundan öňki rekordlarynyň ählisini täzeledi, bu barada Artnet portalyna salgylanmak bilen rossaprimavera.ru habar berýär.
Da Winçiniň sergisi geçen ýylyň oktýabrynda açylypdy. Luwryň müdiri Žan-Lýuk Martinesiň aýtmagyna görä, rekord serginiň işiniň goşmaça wagtynyň kömegi bilen goýuldy. Luwryň gapylary sagat 22:00-a çenli açyk boldy, bu bolsa adamlaryň uly möçberini özüne çekmäge mümkinçilik berdi.
Belli suratkeşiň işleriniň sergisine ortaça her günde 10 müňden gowrak adam geldi. Luwr sergisiniň işiniň soňky güni bolsa 30 müň töweregi adam bardy.
“Aradan çykanyndan 500 ýyl geçensoň hem Täzeden döreýiş eýýamynyň italýan suratkeşiniň giň köpçüligi haýrana galdyrmagyny dowam etdirmegi örän ajaýyp. Meniň buýsanmagyma iki sebäp bar: Leonardonyň köp sanly eserleriniň bir ýere üstünlikli toplanylmagy we köp sanly jemgyýetiň şoňa ünsüniň gönükdirilmegi” – diýip, Martines belleýär.
Sergi da Winçiniň 160 töweregi eserini ýygnady, olaryň hatarynda “Madonna Benua”, “Aýalyň kellesi”, “Mukaddes Ieronim” hem bar. “Mona Liza” Luwrda özüniň öňki ýerinde galdy. Mundan başga-da, sergä baranlar ussadyň şägirtleriniň işlerini hem görüp bildiler.
Suratkeşiň işlerini gözi bilen görüp bilmedikler üçin Luwryň müdiri 2020-nji ýylyň ahyryna çenli “Luwrdaky gije. Leonardo da Winçi” filmini çykarmaga wada berdi.
Mundan öň, suratçy Ežen Delakrunyň eserleriniň sergisi rekord goýupdy, oňa 2018-nji ýylda 540 müň adam geldi.