Geely Hytaýda onlaýn-satuwy işe girizýär

Geely hytaý awtoöndürijisi Hytaýda satuw boýunça onlaýn-hyzmatyny, şeýle-de, müşderileriň öýden çykman awtomobili satyn almaklaryna kömek etmek bilen, eltip berme hyzmatyny hem işe girizýär.
Bu satuwyň möçberini artdyrmaga kömek etjek möhüm ädim bolup durýar, sebäbi ýaňy-ýakynda bolup geçen koronawirus ýaýrawy adamlary awtosalonlara barmakdan saklady. Satyn alyjylar özüniň täze awtomobillerini Geely-niň web-saýtynda sargap we gurnap bilýärler, şeýle-de, ýerli diler merkezleri bilen ylalaşyk boýunça alyjynyň öý salgysyndan başlap, test-draýwlaryny gurnap bilýärler. 
Geely-niň ýerine ýetiriji müdiri Wiktor Ýangyň aýtmagyna görä, onlaýn-satuw strategiýasy awtoöndürijilere satuw we marketing boýunça müşderiler bilen göni aragatnaşygy saklamaga we olara bu işleri geljekde dowam etdirer ýaly tejribe toplamaga mümkinçilik berer. 
Öň Geely onlaýn-satuwyň beýleki platformalaryny peýdalanypdy, brend awtomobilleri ilkinji gezek hususy web-saýty arkaly satýar. Soňky hepdede Tesla, BMW, Mercedes ýaly beýleki awtoöndürijiler hem öz önümlerini Internet arkaly satmak işlerine başladylar, sebäbi Hytaý hökümeti adamlara jemgyýetçilik ýerlerinden daşda durmaklygy duýdurýar.
Fewralyň ilkinji 16 gününde Hytaýda, iri göwrümli awtomobil bazarynda ýeňil awtomobilleriň satuwy geçen ýylyň degişli döwri bilen deňeşdirilende 92% pese düşdi. Fewralda Geely-niň önümçilik göwrümi onuň aýdaky adaty göwrüminiň üçden birine deň boldy.
Hytaýdaky kynçylyklara garamazdan, täze ykjam Geely Icon krossoweriniň satuwa çykandygyny hem belläp geçmeli. Ol Volvo-nyň binýadynda gurnalan. Dizaýnynyň üstünde dürli ýurtlardan professionallar topary iş alyp bardy. Onuň göwrümi meşhur krossowerleriň göwrümi bilen meňzeş: uzynlygy – 4350, ini – 1810, beýikligi 1615.