Türkmenistan syýahatçylyk üçin iň howpsuz döwletleriň reýtingine girdi

Jahankeşdeler syýahat etmek üçin iň howpsuz ugurlary saýlaýarlar. Olaryň bu ugurda gözleglerini ýeňilleşdirmek üçin syýahatçylygy ätiýaçlandyrmak bilen meşgullanýan «Insurly» fransuz agentligi 2020-nji ýylyň ýörite reýtingini düzdi. Agentlik meşhur syýahatçylyk ugurlaryny iň howpsuz «ýaşyl» zolaklardan başlap, «benewşe» reňke çenli 5 ugra böldi.
Reýtingiň döwletleri bahalandyrylanda diňe bir zorlukly jenaýatçylyklar we terrorçylyklar nazara alynman, eýsem, tebigy betbagtçylyklaryň ýygylygy, lukmançylyk statistikasy, ulag howpsuzlygy, ekologiýa ýagdaýy we ş.m. hasaba alyndy.
Orient agentliginiň habar berşi ýaly, Türkmenistan reýtingde «howpsuzlygyň pes derejesi» ugurda sary döwletleriň toparyna girdi we 60-njy orny eýeledi. Türkmenistan Müsür, Braziliýa, Hindistan, Türkiýe, Russiýa Federasiýasy ýaly meşhur syýahatçylyk ugurlaryndan öňe geçmegi başardy. Şol toparda şeýle hem Beýik Britaniýa, ABŞ, Kanada, Fransiýa ýaly döwletler bar.
Syýahatçylar üçin iň rahat ýurt hökmünde Şweýsariýa, Singapur we Norwegiýa bellenildi. Reýtingiň iň ahyrynda 179-njy we 180-nji ýerlerde Afrikanyň Kongo we Sudan döwletleri ýerleşýär.