«Miras» teleradioýaýlymynyň başlygy täzelendi

Türkmenistanyň Prezidenti Gurbanguly Berdimuhamedowyň Karary bilen, Gülnara Muhammedowna Çaryýewa Türkmenistanyň Telewideniýe, radiogepleşikler we kinematografiýa baradaky döwlet komitetiniň «Miras» teleradioýaýlymynyň başlygy wezipesine bellenildi. Dedişli resminama döwlet Baştutany 28-nji ýanwarda geçiren medeniýet ulgamyny hem-de köpçülikleýin habar beriş serişdelerini kämilleşdirmek boýunça iş maslahatynda gol çekdi.
Öň, bu wezipede işlän Baýramdurdyýew Guwanç Ýegenmyradowiç özüne ynanylan wezipäni oňarmandygy üçin, wezipesinden boşadyldy.
Gurbanguly Berdimuhamedowyň belleýşi ýaly, «Miras» teleradioýaýlymynda dünýä medeniýetiniň ösmegine mynasyp goşant goşan halkymyzyň döreden milli gymmatlyklary baradaky gepleşikler ýetmezçilik edýär. Teleýaýlymyň işgärleri öz öňlerinde durýan wezipä sowatly we hemmetaraplaýyn esasda çemeleşmeýärler.
Döwlet Baştutanynyň belleýşi ýaly, halkymyz hemişe nesil terbiýesine möhüm ähmiýet beripdir. Şunlukda, olar çaganyň halal zähmetiniň üsti bilen terbiýelenilmegini, oglanjyklaryň we gyzjagazlaryň özüne mahsus, tebigatyna laýyk gelýän hünärleri saýlap almagyny esasy ugur edinipdirler.
Bu wajyp mesele «Miras» teleradioýaýlymynyň hemişe üns merkezinde bolmalydyr. Onda asyrlaryň jümmüşinden gözbaş alýan perzent terbiýesi, geçmişde döredilen oňyn ýörelgeler, şol bir wagtyň özünde «Paýhas çeşmesi» atly kitapda beýan edilýän nakyllar we olaryň ähmiýeti barada yzygiderli gepleşikler taýýarlanylmalydyr.