Türkmenistanyň Ýaragly Güýçleriniň düzümlerine harby we ýörite atlar dakyldy

Türkmenistanyň Prezidentiniň Permanyna laýyklykda Türkmenistanyň Goranmak ministrliginiň Merkezi serkerdeler öýünde harby gullukçylaryň birnäçesine Watan goragçylarynyň güni mynasybetli mukaddes harby borjuny ak ýürekden berjaý edip, Watanymyzyň goranmak ukybyny pugtalandyrmaga goşan goşantlary hem-de jemgyýetimizde kanunçylygy we hukuk tertibini berkitmekde bitiren hyzmatlary üçin nobatdaky harby atlar dakyldy.
Şeýle hem Türkmenistanyň Goranmak ministrliginiň Harby institutynyň medeniýet öýünde geçen 2019-njy ýylyň jemleri boýunça Türkmenistanyň Ýaragly Güýçleriniň göreldeli harby bölümleri sylaglanyldy.
Harby bölümleriň şahsy düzüminiň düzgün-nyzamyny berkitmekde, söweşjeň we gumanitar taýýarlygyny ýokarlandyrmakda alyp baran işleri seljerildi we bu babatda tapawutlanan harby bölümler ýeňiji diýlip yglan edildi. Ýeňiji harby bölümlere gymmat bahaly sowgatlar, Hormat hatlary we göçme wympelleri gowşuryldy.
Döwlet howpsuzlyk geňeşiniň giňişleýin mejlisiniň barşynda milli Liderimiz esgerleriň we serkerdeleriň bu belent borjy hemişe päk ýürek bilen ýerine ýetirjekdigine, Watana wepalylygyň beýik nusgasyny görkezjekdigine, türkmen halkynyň watansöýüjilik, edermenlik, gaýduwsyzlyk we mertlik ýaly asylly häsiýetlerini berkitmekde ukyp-başarnygyny gaýgyrmajakdygyna berk ynam bildirdi.