Geçen hepde boýunça Türkmenistanyň birža täzelikleri

Geçen hepdede Türkmenistanyň Döwlet haryt-çig mal biržasynyň söwdalarynda geleşikleriň 30-sy hasaba alyndy.
Daşary ýurt puluna Owganystanda, Birleşen Arap Emirliklerinden, Singapurdan, Şweýsariýadan gelen telekeçiler Türkmenbaşydaky nebiti gaýtadan işleýän zawodlar toplumynda öndürilen gidroarassalanan dizel ýangyjyny we awiasion kerosinini satyn aldylar. Russiýanyň işewür toparlarynyň wekilleri Gyýanlynyň polimer zawodynyň ýokary dykyzlykdaky polipropilenini satyn aldylar.
Bulardan başga-da, daşary ýurt walýutasyna dokmak we trikotaž önümleri, gazbeton bloklary, nah ýüplügi, pagta-süýümi ýerlenildi. Satyn alan ýurtlara: Gazagystan, Russiýa, Türkiýe degişlidir. Geleşikleriň umumy bahasy ABŞ-nyň 76 million 509 müň dollaryndan gowrak boldy.
Manat serişdelerine Beýik Britaniýadan, Kanadadan, Birleşen Arap Emirliklerinden we Türkiýeden gelen işewürler jemi bahasy 3 million 722 müň manatlykdan gowrak nah ýüplügi satyn aldylar.
Ýurdumyzyň telekeçileri içerki bazar üçin jemi bahasy 636 müň manatlyk pagta-süýümini satyn aldylar.