Zenan raýatlar Harby instituta okuwa kabul ediler

Türkmenistanyň Goranmak ministrliginiň Harby institutyna okuwa kabul edişligiň başlanmagy bilen, bu ýokary okuw mekdebine orta bilimli, harby gulluga meýletin girmäge isleg bildiren, ýaşy 21-den geçmedik zenan raýatlar hem kabul edilýär. Bu barada Türkmenistanyň Goranmak ministrliginiň «Milli goşun» saýty habar berýär.
Ykbalyny harby ugur bilen baglan zenanlar giň aň-düşünjeli, hakyky watansöýüji bolup ýetişýärler. Munuň şeýledigini dabaraly harby ýörişlerde zenan harby gullukçylaryndan düzülen Zenanlar batalýonynyň başlaryny belent tutup, dogumly ädimleri bilen dabaraly harby ýörişleriň bezegi bolýandyklary hem aňryýany bilen tassyklaýar.
Harby gullukçy zenanlar harby edaralar ulgamynda alnyp barylýan giň gerimli özgertmeleri durmuşa geçirmekde mynasyp zähmet çekip, türkmen zenanlarynyň dogumyny, güýç-gaýratyny görkezip, jebis türkmen halkynyň asuda we abadan durmuşynyň kepili bolup durýan harby ugry ösdürmekde saldamly goşantlaryny goşýarlar.