«Türkmengaz» DK «Kawasaki» kompaniýasy bilen gazbenzin öndürýän zawody dolandyrmak boýunça şertnama baglaşar

«Türkmengaz» döwlet konsernine Ýaponiýanyň «Kawasaki Heavy Industries, Ltd» kompaniýasy bilen bu zawody dolandyrmakda maslahat beriş hyzmatlaryny ýerine ýetirmek barada şertnama baglaşmaga ygtyýar berildi. Degişli Karara Türkmenistanyň Prezidenti sanly wideoaragatnaşyk arkaly geçirilen Hökümet mejlisiniň dowamynda gol çekdi.
Bu resminama laýyklykda, Ýaponiýanyň «Kawasaki Heavy Industries, Ltd» kompaniýasy bilen Ahaldaky gazdan benzin öndürýän zawody dolandyrmakda maslahat beriş hyzmatlary ýerine ýetiriler.
Ahal welaýatynda gazdan ekologiýa taýdan arassa awtomobil ýangyjyny öndürýän dünýäde ilkinji zawodyň gurluşygynyň amala aşyrylmagy netijeli hyzmatdaşlygyň aýdyň mysalydyr. Bu taslamanyň ýerine ýetirilmegi diňe bir milli ykdysadyýetimiziň köpugurly esasda ösdürilmeginde däl, eýsem, dünýäniň nebitgaz senagatynda möhüm tapgyra öwrüldi.
Bu döwrebap toplum ABŞ, Beýik Britaniýa, Fransiýa, Gollandiýa, Şwesiýa, Ýaponiýa, Koreýa Respublikasy, Hindistan we beýleki döwletleriň dünýä belli önüm öndürijileriniň iň täze tehnologiýalary we enjamlary bilen üpjün edildi. Kärhanada ýylda 1 milliard 785 million kub metr «mawy ýangyjy» gaýtadan işlemek we EURO-5 standartyna gabat gelýän EСO -93 görnüşli benziniň 600 müň tonnasyny hem-de dizel ýangyjyny we suwuklandyrylan gazy öndürmek meýilleşdirilýär.