ABŞ we Hytaý söwda geleşiginiň birinji tapgyry hakynda ylalaşyga gol çekdiler

Waşington we Pekin ylalaşyk yglan edýärler. Euronews agentliginiň habar berşi ýaly, ABŞ-nyň Prezidenti Donald Tramp we HHR-iň Döwlet geňeşiniň wise-prezidenti Lýu He söwda jedellerini kadalaşdyrmagyň birinji tapgyry hakynda ylalaşyga gol çekdiler. Bu jedeller iki ýurduň arasynda iki ýyldan gowrak wagt bäri dowam edýär.
Ylalaşygyň esasy şertleriniň biri ABŞ-nyň intellektual eýeçiliginiň goraglylygyna bagyşlanýar. Waşington Pekiniň amerikan tehnologiýalaryny bikanun özleşdirmegi boýunça birnäçe gezek arz edipdi.
«Hytaý amerikan ideýalaryny, söwda syrlaryny, patentlerini we söwda markalaryny goramak bilen bagly düýpli borçnamalary öz üstüne aldy. Bu barada gürrüň gitjekdigi hakynda köpleriň bilmeýän bolmagy hem ahmal. Biz köp zady maslahatlaşdyk. Bu ýaňy bir birinji tapgyr» diýip Tramp aýtdy.
Şeýle hem Hytaý iki ýylyň dowamynda amerikan harytlarynyň, şol sanda oba hojalyk we senagat önümleriniň, şeýle hem energiýa serişdeleriniň importyny 200 mlrd dollarlyk artdyrjakdygyny wada etdi.
Öz gezeginde, Waşington täze salgyt salmalardan ýüz öwürdi we öňküleriniň käbirini azaltdy. Olar resminamalaryň indiki bukjasyna gol çekilýänçä güýjünde galar. Gepleşikleriň ikinji tapgyry eýýäm badalga aldy.