Içerki sarp edijiler üçin 2020-nji ýylda nebit önümleriniň möçberleri tassyklanyldy

Türkmenistanyň Prezidenti «Türkmenistanyň içerki sarp edijileri üçin 2020-nji ýylda nebit önümleriniň möçberlerini tassyklamak hakyndaky» Karara gol çekdi. 
Ýakynda geçirilen hökümet mejlisinde Ministrler Kabinetiniň Başlygynyň orunbasary M.Meredow degişli kararyň taslamasyny döwlet Baştutanynyň garamagyna hödürledi.
Gurbanguly Berdimuhamedow ýangyç-energetika toplumynyň Türkmenistanyň ykdysadyýetinde ähmiýetli orun eýeleýändigini belläp, nebitiň hem-de tebigy gazyň çykarylýan we gaýtadan işlenilýän, ýurdumyzyň içinde we dünýä bazarlarynda isleg bildirilýän dürli nebithimiýa önümleriniň öndürilýän möçberlerini yzygiderli artdyrmagyň hem-de şolaryň görnüşlerini giňeltmegiň möhümdigini aýtdy.
Döwlet Baştutany döwrebap energiýa tygşytlaýjy tehnologiýalary pudaga ornaşdyrmak boýunça işleriň gerimini giňeltmegi, energetika ulgamynyň kärhanalarynyň eksport kuwwatyny berkitjek iri düzüm taslamalaryny ilerletmegiň barşyny berk gözegçilikde saklamagy tabşyrdy.