Türkmenistanda harby gulluga çagyryşyň güýzki möwsümi tamamlandy

Türkmenistanyň Ýaragly Güýçlerine we beýleki goşunlaryna 2019-njy ýylyň güýzki çagyryş möwsümi resmi taýdan üstünlikli tamamlandy. Türkmenistanyň Konstitusiýasyna we Türkmenistanyň «Harby borçlulyk we harby gulluk hakynda» Kanunyna laýyklykda bu möwsümiň dowamynda çagyryş boýunça iki ýyl harby gullugyny geçen harby gullukçylar hem ätiýaçlyga goýberildi. Bu barada Türkmenistanyň Goranmak ministrliginiň «Milli goşun» saýty habar berýär.
Çagyryş möwsümi ýokary guramaçylyk derejesinde geçirildi. Harby gulluga degişli raýatlaryň lukmançylyk barlaglary halkara hil standartlaryna laýyk gelýän sanly enjamlaryň kömegi bilen amala aşyryldy. Netijeliligi ýokarlandyrmak maksady bilen harby wekillikleriň harby gullukçylary we işgärleri tarapyndan öňdebaryjy maglumat tehnologiýalary ulanyldy.
Ýaragly Güýçlerimiziň serkerdeleriniň we borçnama boýunça harby gullukçylarynyň esasy wezipesi – ýaş esgerlere iki ýylyň dowamynda dürli ýaraglaryň, harby tehnikalaryň ulanylyşynyň inçe tilsimlerini öwretmek we olary watançylyk ruhunda terbiýelemekden ybarat bolup durýar. Türkmenistanyň harby gulluk 27 ýaşa çenli erkek raýatlaryň ählisi üçin 2 ýyl möhlet bilen bellenilendir. Ýaragly güýçler üçin harby hünärlere ýeterlik derejede erk edip bilýän ätiýaçdaky gullykçylary taýýarlamak nukdaýnazaryndan bu iň amatly möhlet hasaplanylýar, diýip neşir belleýär.