Türkmenistan Dubaýda we Londonda nebitgaz roud-şoularyny geçirer

«Türkmengaz», «Türkmennebit» döwlet konsernleri we «Türkmengeologiýa» döwlet korporasiýasy 2020-nji ýylda BAE-de we Beýik Britaniýada nebitgaz roud-şoularyny geçrimegi meýilleşdirýär. Bu barada Trend agentligi çäräni guraýjylara salgylanyp habar berýär.
Habarda bellenilişi ýaly, Türkmenistanyň ýangyç-energetika toplumynyň prezentasiýasy 2020-nji ýylyň 24-25-nji fewralynda Dubaý şäherinde, 7-8-nji iýulda bolsa London şäherinde geçiriler.
Guramaçylar hökmünde «Türkmen Forum» we Beýik Britaniýanyň «Gaffney, Cline & Associates» kompaniýalary çykyş eder.
Forumyň dowamynda Hazar deňzinde türkmen gaz ýataklaryny özleşdirmek, daşary ýurt maliýe goýumlaryny çekmek we «Galkynyş» gaz käninde nobatdaky özleşdiriş işleri boýunça soraglar maslahatlaşylar.
Şeýle-de, duşuşyklaryň çäklerinde gyzyklanma bildirýän taraplar bilen işewürlik gepleşikleriniň geçirilmegi hem meýilleşdirilýär.
Belläp geçsek, Türkmenistan tebigy gazyň ägirt uly goruna eýe bolup, dünýäde dördünji orny eýeleýär. Türkmenistanyň nebitgaz toplumyny ösdürmegiň maksatnamasyna laýyklykda 2030-njy ýyla çenli her ýyl tebigy gazyň 250 milliard kub metri we nebitiň 110 million tonnasy çykarylmak göz öňünde tutulýar.
Häzirki tapgyrda Türkmenistan Hytaýa we Russiýa gaz eksport edýär. Türkmenistan – Owganystan – Pakistan – Hindistan gaz geçirijisiniň gurluşygy dowam edýär. Hazarüsti gaz geçirijisiniň gurluşymy maslahatlaşylýar.
«Roadshow» – bu dürli şäherlerde geçirilýän duşuşyklaryň toplumy bolup, esasy maksady belli bir pudakda daşary ýurt maliýe goýumlaryny çekmekden ybaratdyr.