Lebap welaýatynyň günortasynda «Täjibaý» täze gaz käni senagat taýdan ulanyşa girizildi. «Lebap gazçykaryş» müdirliginiň hünärmenleri bu ýerde «mawy ýangyjyň» çykaryşyna başladylar.
«Türkmenistan: Altyn asyr» elektron neşiriniň habar bermegine görä, birinji ulanyş guýusyndan gymmat bahaly energetika çig malynyň onlarça million kub metri alyndy. Gaz guýusynyň gündelik öndürijiligi 450 müň kub metr ýangyja deňdir. Şonuň bilen ugurdaş ýene-de 3 sany gözleg guýusynyň buraw işleri alnyp barylýar.
«Täjibaý» käni 20 ýyldan gowrak öň senagat taýdan ulanyşa girizilen «Malaý» iri gaz meýdançasynyň golaýynda ýerleşýär. Ýakyn ýyllarda promyselde tebigy gazyň çykarylan möçberleri täze guýularyň işe girizilmeginiň hasabyna düýpli artar.
«Lebapgazçykaryş» müdirliginiň hünärmenleri geçip barýan ýyly zähmet üstünlikleri bilen jemleýärler. Ýylyň başyndan bäri, «mawy ýangyjyň» 8 milliard kub metrden gowragy we gaz kondensatynyň 50 müň tonnadan gowragy öndürildi.
«Täjibaý» meýdançasyndan tebigy gazyň millionlarça kub metri çykarylyp başlandy
- 20.12.2019 23:24
- 2k+
