«Yandex» awtomobilleri sürüjisiz dolandyrmak boýunça öz ulgamyny işläp düzýär

«Yandex» sürüjisiz dolandyryş ulgamy üçin lidarlary we kameralary işläp düzýär. Täze sensor bilen üpjün edilen ilkinji sürüjisiz awtomobiller eýýäm synagdan geçip başlady.
Sürüjisiz awtomobilde sensoryň üç sany esasy görnüşi bar: kameralar, radarlar we lidarlar. Bu sensorlaryň berýän maglumatlarynyň birikmegi daşky dünýä barada has anyk maglumatlary bermäge mümkinçilik döredýär. Radar obýekti 300 metre çenli daşlykdan anyklap we onuň tizligini kesgitläp bilýär, ýöne şol obýektiň tipini kesgitlemek üçin maglumatlaryň anyklygy ýeterlik däl. Kamera daş-töwerekdäki predmetlere doly syn etmäge hem-de diňe bir obýektiň tipini kesgitlemäge däl-de, eýsem, ýol belgilerindäki ýazgylar ýa-da ýol yşyklarynyň signallary ýaly detallary hem bilmäge mümkinçilik berýär. Lidar giňişligi obýektlerden serpigip, daş-töweregiň üç ölçegli şekilini döredýän lazer şöhleleri arkaly skanerleýär. Kameralardan tapawutlylykda, lidar şöhlelenme şertlerine bagly bolmaýar hem-de radara garanda obýekt barada has köp maglumat berýär. Lidar – sürüjisiz awtomobiller üçin iň möhüm we iň gymmat sensor.
«Yandex» birbada lidaryň iki tipi bilen işleşýär. 360 gradus syn etmeli birinji lidar sürüjisiz awtomobiliň töweregindäki obýektler barada informasiýa ýygnaýar. Ikinjisi gaty düzümli lidar. Ol 120 gradus syn etme burçuna eýe we awtomobiliň öňündäki obýekt barada has anyk maglumat almak üçin ulanylyp bilner.
Lidarlaryň üstünden doly gözegçiligiň kömegi bilen sürüjisiz dolandyryş ulgamy dürli ýol ssenariýalary we howa şertleri üçin iň amatlysyny saýlamak bilen skanerleme parametrini hereket wagtynda üýtgedip bilýär. Meselem, 200 metr daşlykdan anyk şekilini alyp, ýolda geçelgäniň ýa-da welosipedçiniň bardygyny daşdan anyklamak we aýratyn obýektde fokusirlenmek bolýar. Lidarlar bilen bir hatarda «Yandex» hususy kameralaryny hem barlagdan geçirýär.