Gurbanguly Berdimuhamedow Aşgabat boýunça iş saparyny amala aşyrdy

17-nji dekabrda Prezident Gurbanguly Berdimuhamedow paýtagtymyz boýunça iş saparyny amala aşyryp, şäher düzümini mundan beýläk-de ösdürmek boýunça alnyp barylýan işleriň barşy, ýakyn geljekde gurulmagy meýilleşdirilen dürli maksatly desgalaryň taslamalary hem-de «Aşgabat — Türkmenabat» ýokary tizlikli awtomobil ýolunda alnyp barylýan gurluşyk işleriniň ýagdaýy bilen tanyşdy.
Iş saparynyň başynda Gurbanguly Berdimuhamedow Tähran köçesiniň ugrunda «Beýik — Bina» hususy kärhanasy tarapyndan gurulýan söwda we dynç alyş merkezine baryp gördi.
Bu ýerde ýurdumyzyň gurluşyk senagatynyň ägirt uly kuwwatyny, onuň önümçilik binýadynyň innowasion ulgamyny, türkmen şähergurluşygynyň we binagärliginiň maddy-enjamlaýyn mümkinçiliklerini, kemala gelýän döwrebap şäher we ulag düzümini beýan edýän sergi görkezildi.
Döwlet Baştutany bu ýerde görkezilen eksponatlar bilen tanşyp, ýurdumyzda desgalaryň gurluşygynda diňe ýokary talaplara hem-de standartlara laýyk gelýän önümleriň ulanylmalydygyny belledi. Şunuň bilen baglylykda, degişli ýolbaşçylara tabşyryklar berildi.
Gurbanguly Berdimuhamedow desgalary gurmak bilen çäklenmän, eýsem, olaryň netijeli we maksada laýyk ulanylmagyny, ýokary hilli hyzmatlaryň ýola goýulmagyny üpjün etmegiň wajypdygyna ünsi çekdi.
Şeýle hem Gurbanguly Berdimuhamedow ýokary tizlikli «Aşgabat — Türkmenabat» awtobanynyň gurluşygyna baryp gördi. Uzynlygy 600 kilometre golaý bolan bu uly ýoluň gurulmagy ýurdumyzyň ýol ulgamynyň geçirijilik ukybyny, logistik hyzmatlaryň hilini ep-esli ýokarlandyrmaga, halkara ulag-üstaşyr düzümini hem-de goňşy döwletler bilen söwda-ykdysady gatnaşyklary giňeltmäge mümkinçilik berer.
Türkmenistanyň Prezidenti bu ýerde tehnikalaryň nusgalary, awtobanyny gurmagyň çyzgylary ýerleşdirilen planşetler bilen bilen tanyşdy.
Taslamanyň baş potratçysy hökmünde çykyş edýän «Türkmen Awtoban» ýapyk görnüşli paýdarlar jemgyýetiniň buýurmasy boýunça «Nusaý ýollary» hususy kärhanasy hem-de «Hyzmat merkezi», «Edermen», «Altyn nesil» hojalyk jemgyýetleri ýoluň gurluşyk işlerini amala aşyrýar. Habar berlişi ýaly, bu taslamanynyň umumy bahasy ABŞ-nyň 2 milliard 300 million dollaryna barabar.
Döwlet Baştutany bu taslamany durmuşa geçirmek üçin ýörite satyn alnan demikdiriji maşynlaryň birine münüp, onuň tehniki we ulanyş häsiýetleri bilen gyzyklandy. Awtobana asfalt düşemegiň tehnologiýasy hem-de gurluşyk serişdeleriniň, ýörite ölçeýji abzallar bilen tanyşdy. Şeýle hem yşyklandyryş ulgamynyň, bölüji zolagyň gurluşlarynyň hem-de awtobanyň gapdal germewleriniň nusgalary görkezildi.
Türkmenistanyň Prezidenti degişli ýolbaşçylara ýüzlenip, desgalaryň gurluşygyny öz wagtynda tamamlamak meselelerini üns merkezinde saklamagy tabşyrdy.