Ýylyň dowamynda adamlaryň syýahat baradaky arzuwlara näçe gününi sarp edýändikleri hasaplanyldy

Pikir soraşma geçirmeklige ýöriteleşdirilen OnePoll kompaniýasy adamlaryň indiki syýahatlary baradaky arzuwlaryna näçe minudyny ýa-da sagadyny sarp edýändiklerini anyklamak üçin 2 müňden gowrak adamdan pikir soraşma etdi. Bu barada «Lonely Planet» neşiri ýazýar.
Barlagyň dowamynda pikir soraşylanlaryň 82%-i, umuman, indiki gezelenji baradaky arzuwlara wagt sarp edýän ekenler. Munuň üçin olar ýylda ortaça 200 sagat ýa-da 24 doly iş gününi sarp edýärdiler. Orta statistik syýahatçy ýörite web-saýtlaryň öwrenilmegine aýda 37 minut sarp edýär. Olardan 48%-i bu prosesi nahar wagtynda ýerine ýetirýär. Gatnaşyjylaryň 65%-i, syýahat saýtlaryny görýändiklerini boýun aldylar, çünki olaryň puly ýokdy, diýmek syýahat üçin hem mümkinçilik ýokdy.
Barlagyň başga-da käbir netijeleri habar berilýär. Sorag edilenleriň dörtden üç bölegi rugsat günlerini meýilleşdirenlerinde internet-saýtlaryny görýärler. Şonuň bilen birlikde, syýahatçylaryň üçden bir bölegi başga biriniň pikirlerine ynanýarlar we her gezelenjiniň öň ýanyndan olara bil baglaýarlar. Dostlaryndan we maşgalasyndan maslahat almaga on adamdan ýedisi gatnaşýar. 79% syýahatçy syýahat baradaky iň gowy teklibi saýlamakda aladalanýarlar. 
Soragyň dowamynda başga-da gyzykly faktlar anyklanyldy. Ýagny, sorag edilenleriň 73%-i öz gezelenjiniň haýsy hem bolsa bir bölegini bronlamagy ýatdan çykarýarlar. Respondentleriň ýarysy gezelenji meýilleşdirmegiň – syýahata taýýarlygyň iň agyr tapgyrydygyny boýun aldylar. Ýene 62%-i uçuş gözleginiň hemişe iň dartgynly ýagdaýdygyny belleýärler. Her ikinji diýen ýaly esasy kynçylygyň öňünden gezelenç üçin haýsy hem bolsa bir işi tapmakdygyny hem-de ýoly düzmekdigini belleýärler.
Şu ýylyň ýazynda fin alymlary dynç alşyň iň amatly dowamlylygyny kesgitlediler. Ol 7 günden 11 güne çenli barabar. Finleriň aýtmagyna görä, adama “öçmek” hem-de işi barada ýatdan çykarmak üçin hepdeden biraz köpräk wagt gerek. Ýöne dynç alşyň dowamlylygynyň 11 günden artyk bolmagy adamlaryň elektron poçtalary we iş stolunda üýşen ýumuşlary barada alada edip başlamagyna getirýär.