Eýran Türkmenistany, Yragy we Türkiýäniň baglanyşdyrjak ulag geçelgesini açar

2020-nji ýylyň ýazynda Türkmenistany, Eýrany, Yragy we Türkiýäniň baglanyşdyrjak «Gündogar-Günbatar» ulag geçelgesi işe giriziler. Bu barada Orient agentligi ýol we şäher ösüşi ministriniň orunbasary, ulag infrastrukturasyny ösdürmek boýunça kompaniýanyň ýolbaşçysy Heýrolla Hademiniň ISNA agentligine beren interwýusyna salgylanyp habar berýär.
Bellenilişi ýaly, awtoulag geçelgesi Sarahsda türkmen-eýran serhet nokadyndan başlanyp, Maşada barar, ondan soňra Tährana ýeter. Şol ýerden hem Yraga we Türkiýä barýan iki bölünip gider.
«Bir şaha demirgazyk-günbatarda Töwrize, beýlekisi Tähranyň günbataryna Hemedana gider» - diýip Hademi düşündirdi.
Berlen maglumatlara görä, Töwrizden çykjak geçelgäniň demirgazyk-günbatar ugry Marand şossesine çykar, ol ýerdenem «Bazergan» eýran-türk serhet nokadyna çykmaga mümkinçilik alar.
Günbatar şaha Hemedana ýetip, Kürdüstan welaýatynyň merkezi bolan Senendejom şäheri bilen biriger. Ol ýerden Yrak bilen serhetdäki «Başmak» gözegçilik nokadyna çenli indiki ýylda işe giriziljek uzynlygy 105 km bolan dörtzolakly awtobanyň gurluşygy dowam edýär.
Belläp geçsek, Sarahs (Türkmenistan) – Sarahs (Eýran) geçelgesi Eýrandan Merkezi Aziýa ýurtlaryna eksport harytlarynyň iberilýän möhüm logistika geçelgesine öwrüldi.
Eýranyň ýol we şäher gurluşygy ministrliginiň maglumatlaryna görä, şu ýylyň mart-sentýabr aýlarynda «Sarahs» gümrük gullugyndan demir ýol arkaly Merkezi Aziýa 600 müň tonnadan gowrak haryt eksport etdi. Bu görkeziji geçen ýylyň degişli döwründen 90 göterim artykdyr.