Harby gullukçylar tölegsiz sürüjilik okuw sapaklaryna gatnaşýarlar

Türkmenistanyň Ýaragly Güýçlerinde gulluk edýän esgerlere döredilýän amatly mümkinçilikleriň hatarynda awtomobil sürmäni öwrenmek üçin tölegsiz kurslara gatnamak hem-de sürüji wezipesine bellenmek mümkinçilikleri bar. Häzirki wagtda amala aşyrylýan güýzki çagyryş möwsüminde milli goşunymyzyň hatarlaryny dolduran ýaş esgerler bu mümkinçiliklerden işjeň peýdalanýarlar, diýip «Milli goşun» elektron neşiri habar berýär.
Ýörite ýyllyk meýilnamasyna laýyklykda, ýurdumyzyň harby bölümlerinde awtoulagy dolandyrmaga höwes edýänler hasaba alynýar. Saýlap-seçilen harby gullukçylardan toparlar döredilýär we Hünärmenleri taýýarlaýan harby mekdeplere gatnadylýar. Okuwlar iň täze sanly 3D tehnologiýalaryň – awtoulagy dolandyrmagyň hakykata ýakyn görnüşi bar bolan ýörite türgenleşik otaglarynyň kömegi bilen geçirilýär. Okuwy geçenlerinden soň harby gullukçylar ýerli polisiýanyň ýol gözegçilik gullugynyň bölümlerinde synag tabşyrýarlar.
Sürüjilik şahadatnamasyna eýe bolan Watan goragçylary harby bölümlerdäki ýörite awto-rotalara paýlanylyp, diňe bir awtoulaglary dolandyrmak bilen çäklenmän, eýsem, olary bejermegi öwrenmäge hem mümkinçilik gazanýarlar.