Smartfonda awiarežimi ýakmak nämä gerek?

Uçaryň uçuşyndan we gonuşyndan öň uçarbeletler hemişe ähli elektron enjamlary öçürmegi ýa-da olary awiarežime geçirmegi tabşyrýarlar. Eger-de siz smartfonda awiarežimi ýakmagy ýatdan çykarsaňyz, onda nähili howp ýüze çykyp biler?
Awiarežim näme?
Awiarežim, adyndan belli bolşy ýaly, adaty mobil torlary elýeterli bolmadyk ýagdaýlarynda uçuş wagtynda telefondan peýdalanmak üçin döredilipdir. Şol bir wagtda ähli tor birikmeleri öçürilýär: mobil maglumatlary, Wi-Fi, Bluetooth we NFC. Telefonyň doly öçürilmesi hem şeýle netijäni berer, ýöne gurluşyň awiarežime geçirilmegi has ýerbe-ýer we çalt ýagdaýda amala aşyrylýar.
Uçarda awiarežimi ýakmasaň, nähili ýagdaý ýüze çykar?
Birinjiden, sizi rahatlandyrjak maglumat: siziň ýa-da ýolagçylardan kimdir biriniň smartfonda awiarežimi ýakmagy ýatdan çykarandygy sebäpli size hiç hili çynlakaý howp salynmaz we hatda awiasion heläkçilik hem abanmaz.
Häzirki wagtda uçarlary dolandyryş ulgamy öýjükli torlardan hiç hili päsgelçiligi kabul etmez ýaly ýeterlik derejede kämilleşdirilendir. Elbetde, muny doly derejede inkär etmek bolmaz. Ýöne bort enjamlarynda päsgelçilik ýüze çykaýan ýagdaýynda-da bu howp uçuşa hiç hili täsir etmeýär.
Onda näme üçin heniz hem telefony awiarežime geçirmegi tabşyrýarlar?
Bir tarapdan, bu awiakompaniýalaryň ätiýaçly bolmagy bilen bagly: işleýän telefonlar barybir uçarmanlaryň radioaragatnaşygyna täsir edip bilýärler. Şeýle ýagdaýyň ýüze çykmak mümkinçiligi az, ýöne ol bar. Bu howpsuzlyga düýpli päsgel bermese-de, uçarmanlar üçin oňaýsyzlygy döredip bilýär.
Beýleki bir tarapdan – häzirki wagtda awiarežim enjamlaryň howpsuzlygy üçin gerek bolşy ýaly, ýolagçylaryň rahatlygy üçin hem gerekdir: uçuş we gonuş wagtynda olaryň biri-birine telefon gepleşikleri bilen päsgel bermez ýaly. Mundan başga-da, käbir ýagdaýlarda uçarbeletler diňe bir enjamlary öçürmegi ýa-da ony awiarežime geçirmegi tabşyrman, eýsem, ony öňdäki kreslonyň jübüsine aýyrmagy tabşyrýarlar. Bu güýçli gonuş we şowsuz uçuş bolan ýagdaýynda ätiýaçlykdyr – güýçli silkmede siz telefony eliňizden gaçyrmarsyňyz, ol bolsa başga bir ýolagça düşmez.