Gabarasyz ýükler üçin niýetlenilen uçar şahadatnamadan geçdi

Airbus ýewropa awiagurluşyk konserni gabarasyz ýükleri daşamak üçin niýetlenilen täze Beluga XL transport uçarynyň şahadatnamadan geçmek işini tamamlady. Flightglobal web-saýtynyň ýazmagyna görä, awiasion howpsuzlygynyň Ýewropa agentligi birinji uçuşyndan 16 aý geçenden soň transport uçaryna şahadatnama berdi.
Şahadatnama prosesi netijede täze uçaryň awiasion hökümetiniň uçujy enjamlara hödürleýän talaplaryna doly laýyk gelýändigini subut edýän dürli synaglary geçirmegi göz öňünde tutýar. Täze awiasion tehnikasynyň şahadatnama prosesi, hakykatda onuň taýýarlaýyş işleriniň tapgyrynda birinji synagy geçýän wagtyndan başlanýar.
Beluga XL-iň şahadatnama meýilnamasyna jemi 200 uçuşy amala aşyran iki uçar gatnaşdy. Şahadatnamany üstünlikli geçmegiň kömegi bilen Airbus ýükleri yzygiderli daşamak üçin Beluga XL uçarlary 2020-nji ýylyň başynda ulanmaga başlap biler.
Beluga XL ýük uçarynyň taslamasyna 2014-nji ýylyň noýabrynda başlanylypdy. Täze transport uçarynyň esasy hökmünde hünärmenler A330-200 ýolagçy laýnerini aldylar.
Şahadatnama laýyklykda, Beluga XL uçarlary 51 tonna çenli agramlykdaky ýükleri daşamaklyga niýetlenilen. Şahadatnama resminamasynda transport uçary üçin iň ýokary uçuş agramynyň iki warianty görkezilen: 205 we 227 tonna. Şonuň bilen birlikde iň ýokary gonuş massasy iki wariant üçin hem birmeňzeş – 187 tonna. Transport uçarynyň uzynlygy 63,1 metre barabar, ganatynyň gerimi – 60,3 metr, beýikligi – 227 tonna iň ýokary uçuş massasynda 18,9 metr.
Beluga XL doly ýüklenilen ýagdaýynda dört müň kilometre çenli aralykda uçuşy amala aşyryp bilýär. Airbus täze uçarlar bilen A350 XWB ýolagçy laýnerleriniň ganatlaryny daşamagy meýilleşdirýär. Bir uçara ganatyň iki sany doly ýygnalan konsollary ýerleşip bilýär.
Täze transport uçarlary ýuwaş-ýuwaşdan 1990-njy ýyllarda A300 laýneriň esasynda döredilen könelişen Beluga-nyň ýerini çalşyrar. Airbus konserniniň awiaparkyna 5 sany şular ýaly uçujy apparat girýär.