Microsoft amerikan korporasiýasynyň ýapon şahamçasy dörtgünlük iş hepdesine geçmek bilen eksperiment geçirdi. Onuň dowamynda iş wagtynyň gysgaldylmagyna garamazdan, zähmet önümliliginiň ep-esli artýandygy anyklanyldy. Bu barada Trendiň mälim etmegine görä, TACC-a salgylanmak bilen Asahi gazeti habar berýär.
Şu ýylyň awgust aýynda kompaniýa özüniň 2,3 müň töweregi işgärini, her bäşinji gün hak tölenilýän rugsadyň hasabyna girýän täze grafika geçirdi. Şeýle-de, işgärlere şol aýyň içinde ýörite duşuşyk guraman, messenjerlarda onlaýn-çat arkaly ýygy-ýygydan aragatnaşyk etmek tabşyryldy. Zerur bolan halatynda gepleşikleri 30 minutdan köp geçirmezlik we olara köpünden bäş adamy çagyrmaklyk rugsat berildi.
Eksperimentiň netijesi boýunça, bir işgäre satuwyň möçberiniň ösüşiniň 40% bolandygy kesgitlenildi. Şonuň bilen birlikde ofisde elektroenergiýanyň sarp edilişi 23% peseldi, çap işleri we kopiýa etmek üçin kagyzlaryň ulanylyşy bolsa ýarysyndan kemeldi.
Sorag geçirmäniň netijesinde alnan maglumatlara görä, işgärleriň 92% töweregi dörtgünlük iş hepdesine geçilmegini oňyn bahalandyrdylar we stresiň derejesiniň peselendigini bellediler. Muňa garamazdan, eksperiment wagtynda artyk edilen işiň möçberi hasaba alynmady, ýöne Microsoft awgust boýunça hiç hili agyr işleriň bellige alynmandygyny nygtaýar.
Ýapon şahamçasy dörtgünlük iş hepdesini hemişelik esasda girizmekçi däl, ýöne onuň bilen eksperimenti dowam etdirmäge taýýar.
«Microsoft» Ýaponiýada zähmet öndürijiligini 40% ýokarlandyrdy
- 13.11.2019 01:05
- 1.8k+
